थाइल्यान्डमा सिनेटको निर्वाचन मिति तय

थाइल्यान्डले सोमबार आगामी महिना आफ्नो सिनेट निर्वाचनको विवरण घोषणा गरेको छ । एक दशकअघि सैन्य कूपछि माथिल्लो सदनका लागि यो पहिलो मतदान हुनेछ । प्रधानमन्त्री श्रेथा थाभिसिनको मन्त्रिपरिषद्ले गत महिना पूर्ण जनमत समावेश नभएको जटिल र बहुचरण निर्वाचनको योजनालाई अनुमोदन गरेको छ । थाइल्यान्डको निर्वाचन आयोगले जुन ९, १६ र २६ मा तीन चरणको मतदान हुने पुष्टि गरेको छ । यसमा सिनेटर बन्नका लागि आवेदन गर्ने मानिस मात्र मतदानका लागि योग्य हुनेछन् । नयाँ सिनेटले निर्वाचनपछि प्रधानमन्त्रीलाई अनुमोदन गर्न मतदान गर्नेछैन ।

सन् २०१४ मा सत्ता कब्जा गर्ने सैन्य समर्थक सरकारले नियुक्त गरेको दुई सय ५० सदस्यीय वर्तमान सिनेटले गत वर्ष आम निर्वाचनको नतिजा निर्धारण गर्न महत्त्वपूर्ण भूमिका निर्वाह गरेको थियो ।   प्रोग्रेसिभ मुभ फरवार्ड पार्टीले तल्लो सदनमा सबैभन्दा धेरै सिट जिते पनि सिनेटमा पर्याप्त समर्थन जुटाउन नसकेकाले उक्त पार्टीका नेता पिटा लिम्जारोन्त्रातलाई प्रधानमन्त्री बन्नबाट रोकिएको थियो ।

निर्वाचनमा दोस्रो स्थान हासिल गरेको फु थाई पार्टीकाश्रेथाले सेनासँग आबद्ध दलहरूसँग मिलेर गठबन्धन सरकार बनाउनुभयो । सङ्ख्या घटाएर दुई सय बनाइएको सिनेटरहरूलाई न्याय, शिक्षा, सार्वजनिक स्वास्थ्य, उद्योग, कला र खेल, वृद्ध र जातीय अल्पसङ्ख्यकसहित काम र जीवनका विभिन्न २० क्षेत्रबाट चयन गरिन्छन् । उक्त प्रक्रिया अलोकतान्त्रिक र अनावश्यकरूपमा जटिल भएको आलोचकहरूले बताएका छन् ।
उम्मेदवारहरूको दर्ता मे २० र २४ को बीचमा खुला हुनेछ । निर्वाचनको परिणाम जुलाई २ मा आउने अपेक्षा गरिएको छ ।

सम्बन्धित समाचार

सबै