काभा यू-२० महिला भलिबलः नेपालले श्रीलंकासँग पहिलो खेल खेल्ने

40 Shares

काठमाडौं । यही जुलाई १८ देखि २३ सम्म माल्दिभ्सको मालेमा हुने काभा यू–२० महिला भलिबल च्याम्पियनसिपमा नेपालले श्रीलंकासँग पहिलो खेल खेल्ने भएको छ ।

सेन्ट्रल एसियन भलिबल एसोसिएसन (काभा) ले मंगलबार सार्वजनिक गरेको खेलतालिका अनुसार नेपालले जुलाई १८ मा श्रीलंकासँग खेल्दै यात्रा सुरु गर्नेछ ।

च्याम्पियनसिपमा नेपाल र श्रीलंकासहित आयोजक माल्दिभ्स, कीर्गिस्तान गरी कूल चार टोलीको सहभागिता रहेको छ ।
नेपालले दोस्रो खेल जुलाई २० मा कीर्गिस्तानसँग र तेस्रो खेल माल्दिभ्ससँग जुलाई २० मा खेल्नेछ ।

सिंगल राउण्ड रोविनका आधारमा सबै टिमले एक आपसमा खेलेपछि सेमिफाईनल खेल हुनेछ । लिगमा पहिलो हुने र चौथो हुने तथा दोस्रो हुने र तेस्रो हुनेबीच सेमिफाईनल खेल हुनेछ । फाईनल खेल जुलाई २३ मा हुनेछ ।

नेपालले काभा यू–२० को उपाधि जित्ने लक्ष्यसहित तयारी गरिरहेको छ । मुख्य प्रशिक्षक कुमार राई र।सहायक प्रशिक्षक अर्जुन घिमिरेले नेपाली टिमलाई प्रशिक्षण दिईरहेका छन् ।

सहानाप्रधान स्मृति यू१९ भलिबल प्रतियोगितामा गरेको प्रदर्शनको आधारमा काभा यु-२० का लागि १२ खेलाडी छनोट गरिएको हो । नेपाली टोली जुलाई १६ मा माल्दिभ्स प्रस्थान गर्नेछ ।

नेपाली टोली
सलिना बुढा मगर, जेनिशा विश्वकर्मा, एलिसा मानन्धर, निशा महर, भावना तामाङ, एन्जिला प्रधान, निशा चौधरी, आरती चौधरी, मिना सुनार, अनुषा चौधरी, स्नेहा ठगुन्ना, आशिका क्षेत्री

मुख्य प्रशिक्षक : कुमार राई
सहायक प्रशिक्षक : अर्जुन घिमिरे
टिम व्यवस्थापक : जुनु पुन

सम्बन्धित समाचार

सबै