बीबीसी । अमेरिकी पूर्वराष्ट्रपति डोनाल्ड ट्रम्पले रूसी राष्ट्रपति भ्लादिमिर पुटिनले युक्रेनबाट रूसी एयरबेसहरूमा भएको ड्रोन आक्रमणको कडा जवाफ दिने चेतावनी दिएको बताएका छन् ।

ट्रम्पले पुटिनसँग एक घण्टाभन्दा लामो फोन संवादपछि सामाजिक सञ्जालमार्फत जानकारी दिँदै भने, ‘राष्ट्रपति पुटिनले एयरफिल्डहरूमा भएको हालको आक्रमणको जवाफ दिनैपर्ने बताएका छन्।’

यद्यपि, रूसी अधिकारीहरूले यस कुराको औपचारिक पुष्टि गरेका छैनन्। तर मस्कोले यसअघि सम्भावित सैन्य प्रतिक्रियालाई अस्वीकार नगरेको स्पष्ट पारिसकेको छ ।

रूसी समाचार एजेन्सी रिया नोभोस्तीका अनुसार, पुटिनले ट्रम्पलाई युक्रेनले शान्तिवार्ता विफल बनाउन खोजेको र किभको सरकार ‘आतङ्कवादी संगठन’मा परिणत भएको आरोप लगाएका छन् ।

त्यस्तै, दुवै नेताबीचको संवादले अमेरिका र रूसबीच पुनः सहकार्य सुरु गर्ने विषयमा ‘सकारात्मक सम्भावना’ रहेको उल्लेख गरिएको छ ।

यो संवाद युक्रेनले जुन १ मा रूसी एयरबेसहरूमा ड्रोनमार्फत हमला गरेको केही दिनपछि भएको हो । युक्रेनले ती आक्रमणहरू रूसी परमाणु क्षमतायुक्त बमवर्षकहरूलाई लक्षित गरेर गरिएको बताएको छ ।

फोनवार्तामा ट्रम्पले उक्त आक्रमणको पूर्वजानकारी अमेरिकालाई नदिइएको भन्ने पुटिनलाई स्पष्ट पारेको रूसी राष्ट्रपतिको कार्यालयका सल्लाहकार युरी उशाकोभले बताएका छन् ।

युक्रेनका रणनीतिक उद्योग मन्त्री युरी साकले अमेरिका थप प्रतिबन्ध र दबाबमार्फत रूसी आक्रमणको जवाफ देओस् भन्ने अपेक्षा गरिएको बताएका छन्।

यसैबीच, युक्रेनी राष्ट्रपति भोलोदोमिर जेलेन्स्कीले सामाजिक सञ्जाल ‘एक्स’ मा पोस्ट गर्दै भनेका छन्, ‘धेरै वार्ताहरू भए, तर तीमध्ये कुनैले शान्ति ल्याउन सकेन। यदि विश्वले पुटिनका धम्कीलाई कमजोर प्रतिक्रिया दिन्छ भने, उनले त्यसलाई आँखा चिम्लिएको रूपमा बुझ्छन्।’

यही साता, इस्तानबुलमा युक्रेन र रूसबीच भएको दोस्रो चरणको वार्ता कुनै ठोस सहमतिबिना टुंगिएको थियो । यद्यपि, युद्धबन्दीहरूको आदानप्रदानमा सहमति जुटेको थियो ।

यता, ट्रम्पले अघिल्लो साता पुटिनलाई दुई साताभित्र शान्तिवार्तामा ठोस प्रगति नभए अमेरिकाले आफ्नो नीति परिवर्तन गर्ने संकेत गरेका थिए। तर उनले आफ्नो पछिल्लो पोस्टमा भने उक्त समयसीमा वा आलोचनाको उल्लेख गरेका छैनन् ।