काठमाडौं । नेपाली फिल्म ‘महाराजधिराज’ मा अभिनेतृ उषा रजक अनुबन्ध भएकी छन् । निर्देशक परिच्छेद सेनको निर्देशनमा बन्ने फिल्ममा अभिनेतृ रजकको प्रवेशसँगै मुख्य कलाकारहरूको लाइनअप पूरा भएको निर्माण युनिटले जनाएको छ ।

सोमबार निर्माण पक्षले रजकलाई प्रमुख भूमिकामा अनुबन्ध गरेको घोषणा गर्दै फिल्मको प्रमुख स्टारकास्ट टुंगिएको हो । यसअघि नै आर्यन सिक्देल, रमेश उप्रेती, पल शाह, पुष्प खड्का, जय किशन बस्नेत, गजित विष्ट जस्ता चर्चित अभिनेता फाइनल भइसकेका थिए ।

यस्तै वर्षा राउत र वर्षा शिवाकोटी, आशा पौडेल पनि यो फिल्ममा प्रमुख भूमिकामा देखिँदै छन् । यो फिल्ममा निर्देशक सेनले कथा लेखन पनि आफैंले गरेका हुन् ।

छत्रेश्वर म्यानेजमेन्ट प्रालिको ब्यानरमा निर्माण हुने‘महाराजधिराज’ को निर्मातामा टोपेन्द्र विष्ट, चक्रबहादुर केसी र रवि खड्का रहेका छन् । फिल्म आगामी फूलपातीमा देशभर प्रदर्शनमा आउने तयारीमा छ ।