२७ मंसिर २०८१, बिहीबार
ऋषि कट्टेल ।
सरकारको गठबन्धन फेरिएपछि एमाले माओवादीबीचको अन्तरविरोध शत्रुतापूर्ण बन्दै गइरहेको छ । योगेश भट्टराईले ‘हिंसा’ शव्द प्रयोग गरेपछि निषेधको तहसम्मका धम्कीपूर्ण वक्तव्यहरु माओवादीले आधिकारिकरुपमै सार्वजनिक गरिररहेको छ । चरित्रहत्याका अनेकन आरोपहरु सार्वजनिक भइरहेका छन् । माओवादी केन्द्रका माहासचिव देव गुरुङले अबको मुख्य संघर्ष एमालेसँगै हुने भनेपछि अन्तरविरोधको स्तर अझै बढ्नेछ । माओवादी केन्द्रका सुप्रोमोको अभिव्यक्ति पनि काँग्रेसप्रति नरम र एमालेप्रति गरम आएपछि तलसम्मका माओवादीका कार्यकर्ताहरु उत्तेजित बनेका छन् । यसो सतहमा हेर्दा यिनीहरुबीच भौतिक रुपमै भिडन्त हुने आशंका भैरहेको छ ।
यसो किन भैरहेको छ ? के यी दुईमा चलेको द्वन्द्व सैद्धान्तिक हो ? पटक्कै हैन । यी दुवै कम्युनिष्ट आन्दोलनका विसर्जनवादी हुन् । संसदवादमा पतन भएका प्रतिक्रियावादका मतियार हुन । एमसीसी जस्ता राष्ट्रघातका मतियार हुन् । दुवै लम्पसारवादी हुन् । यती, ओम्नी, एनसेल, लडाकू घोटाला, सुन तस्करीलगायत अनेकन काण्डका सहकर्मी हुन् । सारतः यी दुवै दलाल पुँजीवादका खेताला हुन् ।
एउटै वर्ग चरित्र र व्यवहार भएकाहरुबीच किन शत्रुतापूर्ण अन्तर विरोध ? भन्ने प्रश्न उठछ । उनीहरुको बीचको शत्रुता लुटतन्त्रको स्वमित्वको लागि हो । नक्कलीनै भएपनि यी दुवैले आफूलाई कम्युनिष्ट भनिरहेका छन् । अब संसदमा यी दवै समान अस्त्विमा रहन सक्दैनन् । यी दुवैको भोट बैंक एउटै हो । २०६४ मा माओवादी केन्द्रले एमालेको भोट बैंक तान्यो माओवादी ठूलो पाटी बन्यो । २०७९ सम्म आइपुग्दा सबैजसो मत एमालेले तान्यो माओवादी अस्तित्व रक्षाको ठाँउमा पुग्यो । सरकारमा बसेर जेनतेन अस्तित्व बनाइरहेको थियो त्यो पनि सायद अब कहिल्यै नफर्किएला जस्तो गरी गुम्यो । यही मौकामा एमाले माओवादी केन्द्रलाई धकेलेर भित्तामा पुरयाएर आत्मसमर्पण गराउन चाहन्छ र लुटतन्त्रमा आफ्नो एकाधिकार बनाउन चाहन्छ । माओवादी केन्द्र सहजै आत्मसमपर्णण गर्न तयार भैरहेको छैन ।
अहिले माओवादी केन्द्र जनयुद्धलाई महानताको संज्ञा दिएर, उज्यालो नेपालको जनप्रियतालाई भजाएर र भ्रष्टाचारको फाइल खोलेर आफूलाई जोगाउन सकिन्छ भनेर लागिरहेछ भने एमाले युद्धलाई अपराधीकरण गरेर, उज्यालो नेपालको नायक बनाइका कुलमान घिसिङलाई कमिसन एजेण्ट प्रमाणित गरेर र दाहालसँग सम्बन्धित फाइलहरु खोलेर माओवादीका मुद्दाहरुलाई निस्तेज गराउन मात्र हैन उसलाई समाप्त गर्ने हतियारको रुपमा प्रयोग गर्न चाहन्छ । रक्षात्मक अवस्थामा पुगेको माओवादी केन्द्रलाई आक्रामक अवस्थामा पुगेको एमालेसँग जुध्न निकै कठिनाई दखिँदैछ । अहिले एमाले माओवादीबीच चलिरहेको अन्तर्य यही हो । अरु सबैकुरा बहानावाजी हुन् ।
