काठमाडौँ / नेपाल प्रहरीको केन्द्रीय अनुसन्धान ब्युरोले बिमा बापतको ठुलो रकम भुक्तानी लिन विवाह दर्ता गरी सवारी दुर्घटना गराएको अभियोगमा ६ जनालाई पक्राउ गरी अनुसन्धान सुरु गरेको छ ।

ब्युरोले शुक्रबार काठमाडौँमा पत्रकार सम्मेलन गर्दै बाँकेको कोहलपुर बस्ने २१ वर्षीय सर्जन विकको सवारी दुर्घटना गराएर हत्या र हत्यापश्चात् बिमा रकम असुल गरिएको सम्बन्धमा ६ जनालाई पक्राउ गरी सङ्गठित अपराध र ठगीमा म्याद थप गरी अनुसन्धान सुरु गरेको जनाएको हो । पक्राउ परेका बाँके कोहलपुरका सपना मल्ल, सञ्जीव अर्याल, सरदार अहमद खाँ, टोपबहादुर राना, दीपक केसी र ललिता सापकोटालाई प्रहरीले सार्वजनिक पनि गरेको छ ।

उनीहरूले २०७८ वैशाख २ गते बाँकेको कोहलपुर नगरपालिकामा २१ वर्षीय सर्जन विकको योजनाबद्ध दुर्घटना गराई साढे २ करोड बराबरको बिमा रकम लिएको अनुसन्धानबाट खुलेको ब्युरोका प्रहरी अतिरिक्त महानिरीक्षक उत्तम राज सुवेदीले जानकारी दिनुभयो ।

उनीहरूले सवारी दुर्घटना गराएर बिमा रकम दाबी गर्ने उद्देश्यले सपना मल्लसँग सर्जनको विवाह दर्ता गराएका थिए । विवाद अघि नै उनीहरूले सर्जनको जीवन बिमा र म्यादी जीवन बिमा गराएका थिए । दुर्घटनामा सर्जनको मृत्यु भएपछि २०७८ साउन १४ गते रिलायन्स लाइफ इन्स्युरेन्सबाट सपनाले बिमा रकम बुझेर कामना सेवा विकास बैङ्क कोहलपुरको खातामा जम्मा गरेको देखिएको छ । त्यस्तै, २०७८ पुस ३० गते नेपाल पुनर्बीमा कम्पनीले सर्जन विकको सवारी दुर्घटना शङ्कास्पद देखिएपछि केन्द्रीय अनुसन्धान ब्युरो ९सीआइबी०लाई खबर गरेको र त्यसपछि ब्युरोले अनुसन्धान गरेको सुवेदीले जानकारी दिनुभयो ।

दुर्घटना हुनुभन्दा दुई महिना अघि मात्रै मृतकको नाममा बैङ्क खाता खोलिनु, विवाहअघि नै सपनालाई इच्छाएको व्यक्ति भनेर राखिनु र मृतकको त्यति ठुलो बिमा गर्ने आर्थिक हैसियत नहुनु लगायत शङ्काका आधारहरू देखिएको पनि ब्युरोका प्रहरी अतिरिक्त महानिरीक्षक सुवेदीले बताउनुभयो । गिरोहका सदस्यले ठुलो रकमको विवाह गराई हत्या गरी मृत्यु पश्चात् बिमा कम्पनीबाट आउने ठुलो रकम बाँडफाँड समेत गरेको पाइएको प्रहरीले जनाएको छ ।

भिडियो…….

YouTube0
YouTube
RSS
Follow by Email