काठमाडौं । स्वतन्त्र सांसद डा. अमरेशकुमार सिंहले नेता र न्यायाधीशहरुको कल डिटेल सार्वजनिक गर्न माग गरेका छन् ।

बिहीबारको प्रतिनिधिसभा बैठकमा सांसद सिंहले मुद्दा प्रभावित पार्न कानुनमन्त्रीले न्यायाधीशसँग कुरा गर्ने गरेको भन्दै नेता र न्यायाधीशको कल डिटेल सार्वजनिक गर्न माग गरेका हुन् ।

उनले भने, ‘कानूनमन्त्रीले बिहान बिहानै जिल्लाको मुद्दा प्रभावित गर्न परे एक नम्बर र उच्चमा छ भने मुद्दा प्रभावित पार्न मुख्य न्यायधीशलाई फोन गर्ने गरेको थाहा । कानूनमन्त्रीको कल डिटेल आयो भने थाहा हुन्छ । मन्त्रीले न्यापरिषद्मा कुरा राख्ने हो, न्यायाधीशलाई फोन गरेर न्यायलय प्रभावित गर्न पाइँदैन ।’

उनले कानूनमन्त्रीले न्यायाधीशलाई पटक–पटक फोन गरेको आफूसँग सूचना रहेको दाबी गरे । उनले कल डिटेल गल्ती भयो भने आफू सांसद पद त्याग्न समेत तयार रहेको बताए ।

सांसद सिंहले न्याय परिषदको औचित्य समेत समाप्त भएकाले विघटन गर्न माग गरे । उनले भने, ‘न्यायपरिषदको औचित्य आवश्यकता छैन । न्यायपरिषद एउटा सिन्डिकेट हो । त्यो सिन्डिकेट प्रणालीलाई समाप्त गर्नुपर्छ किनकि यो राजनीतिक सिन्डिकेट हो ।’