काठमाडौं। भर्खरै मात्र ‘है जवानी तो इश्क होना है’ फिल्मको टिजर सार्वजनिक गरिएको छ । निर्देशक डेभिड धवन निर्देशित यो फिल्म चाँडै नै हलमा रिलिज हुने तयारीमा छ । तर फिल्म रिलिज हुनुअघि नै धवनले आफ्नो करियरबारे दिएको प्रतिक्रिया सामाजिक सञ्जालमा चर्चाको विषय बनेको छ ।

एएनआईसँगको अन्तर्वार्तामा डेभिड धवनले ‘है जवानी तो इश्क होना है’ आफ्नो अन्तिम फिल्म हुन सक्ने संकेत गरेका छन् ।

तीन दशकभन्दा बढी समयदेखि बलिउडमा सक्रिय धवनले हालसम्म ४५ भन्दा बढी फिल्म निर्देशन गरिसकेका छन् । उनले सञ्जय दत्त, अनिल कपूर, गोविन्दा र सलमान खानजस्ता चर्चित कलाकारसँग काम गरेका छन् । धवनले आफ्नो सफलताको श्रेय फिल्म निर्माता तथा निर्देशक मनमोहन देसाईलाई दिने गरेका छन् ।

यो फिल्म २०२६ मे २२ मा सिनेमा हलमा रिलिज हुने तय गरिएको छ । फिल्ममा वरुण धवन, मृणाल ठाकुर र पूजा हेगडे मुख्य भूमिकामा देखिनेछन् । वरुण धवन र डेभिड धवनको यो तेस्रो सहकार्य हो । यसअघि उनीहरूले ‘मैं तेरा हीरो’ र ‘जुडवा २’ मा सँगै काम गरिसकेका छन् ।