काठमाडौं। चलचित्र ‘काला हिरण’ लाई लिएर विवाद थप गहिरिँदै गएको छ। निर्माण घोषणा र पोस्टर सार्वजनिक भएपछि सुरु भएको बहस अहिले कानुनी तहसम्म पुगेको छ।

बलिउड अभिनेता सलमान खानको कानुनी टोलीले फिल्म रोक्न माग गर्दै नोटिस पठाएपछि निर्माण पक्षले पनि सार्वजनिक रूपमा प्रतिक्रिया दिएको छ।

निर्माता अमित जानीले आफ्नो आधिकारिक फेसबुक अकाउन्टमार्फत भिडियो सन्देश जारी गर्दै चलचित्रलाई लिएर फैलिएको बुझाइ गलत भएको बताएका छन्। उनका अनुसार ‘काला हिरण’ कुनै बायोपिक होइन र यो चलचित्रलाई केवल सलमान खानको दृष्टिकोण वा जीवन कथामा आधारित भनेर बुझ्नु गलत हुनेछ।

उनले भिडियोमा भनेका छन्, सलमान खानको कानुनी टोलीले चलचित्रको प्रदर्शन रोक्न र आगामी जुन २० मा सार्वजनिक गर्ने तयारी गरिएको टिजर समेत रोक्न दबाब दिइरहेको छ। जानीले यसलाई सिर्जनात्मक स्वतन्त्रतामाथिको हस्तक्षेपको रूपमा व्याख्या गरेका छन्।

यसैबिच एबिपी न्युजसँगको कुराकानीमा उनले चलचित्रको मुख्य उद्देश्य फरक रहेको दाबी गरेका छन्। उनका अनुसार ‘काला हिरण’ ले बिश्नोई समाजको इतिहास, उनीहरूको सांस्कृतिक विरासत, वन्यजन्तु संरक्षणप्रतिको प्रतिबद्धता र सामाजिक संघर्षलाई पर्दामा उतार्ने प्रयास गरेको छ। उनले सलमान खानलाई कथाको केवल एक हिस्सा मात्र बनाइएको स्पष्ट पारेका छन्।

यसअघि सलमान खान पक्षबाट कानुनी नोटिस जारी गरिएको थियो। सञ्चारमाध्यमका रिपोर्टअनुसार डीएसके लीगल नामक कानुनी फर्मले कास्टिङ निर्देशक अक्षय पाण्डेलाई उक्त नोटिस पठाएको हो। नोटिसमा प्रस्तावित चलचित्र ‘काला हिरण’ को निर्माण, प्रचारप्रसार र वितरण तत्काल रोक्न माग गरिएको उल्लेख छ।

नोटिसमा चलचित्रले सलमान खानसँग सम्बन्धित पुरानो काला हिरण शिकार प्रकरणलाई आधार बनाएको भन्दै यसले उनको व्यक्तिगत छवि, प्रतिष्ठा र गोपनीयतामा असर पार्न सक्ने दाबी गरिएको छ।

साथै, यसले अदालतमा विचाराधीन मुद्दामा समेत प्रभाव पार्न सक्ने सम्भावना रहेको उल्लेख गर्दै उनको नाम, पहिचान वा उनीसँग सम्बन्धित घटनाक्रम प्रयोग गर्न अनुमति नदिएको स्पष्ट गरिएको छ।

यस घटनापछि चलचित्र उद्योगमा ‘व्यक्तिगत घटना र वास्तविक जीवनका पात्रहरूको प्रयोग’ सम्बन्धी कानुनी बहस पनि पुनः सतहमा आएको छ। विशेषगरी कुनै चर्चित व्यक्तिको जीवनसँग जोडिएका संवेदनशील घटनालाई चलचित्रमा उतार्दा अनुमति आवश्यक हुन्छ वा हुँदैन भन्ने प्रश्न फेरि उठेको छ।

सार्वजनिक विवरण अनुसार चलचित्रको पोस्टर गत शुक्रबार सार्वजनिक गरिएको थियो। पोस्टर सार्वजनिक भएपछि नै सामाजिक सञ्जालमा मिश्रित प्रतिक्रिया आएको थियो। केहीले यसलाई साहसिक कथानक भनेका छन् भने केहीले संवेदनशील मुद्दालाई मनोरञ्जनका रूपमा प्रस्तुत गर्न नहुने टिप्पणी गरेका छन्।

निर्माण पक्षले आगामी जुन २० मा चलचित्रको पहिलो झलक र टिजर सार्वजनिक गर्ने घोषणा गरिसकेको छ। तर कानुनी विवादका कारण उक्त तालिका प्रभावित हुने हो वा होइन भन्ने विषय अझै स्पष्ट भएको छैन।

चलचित्रमा सलमान खान र ग्याङ्स्टर लरेन्स बिश्नोईबीचको विवाद पनि देखाइने चर्चा छ। तर मुख्य भूमिकामा को कलाकार छन् भन्ने विषय निर्माण पक्षले गोप्य राखेको छ, जसले चलचित्रप्रतिको कौतुहलता अझ बढाएको छ।

यो मुद्दाको ऐतिहासिक पृष्ठभूमि सन् १९९८ को काला हिरण शिकार प्रकरणसँग जोडिएको छ। त्यतिबेला सलमान खान जोधपुरमा चलचित्र ‘हम साथ साथ हैं’ को छायांकनमा थिए। त्यस क्रममा उनीमाथि काला हिरण र चिंकारा शिकारसँग सम्बन्धित मुद्दा दर्ता भएको थियो। सोही घटनापछि उनीसँगै सैफ अली खान, तब्बु, सोनाली बेन्द्रे र नीलमविरुद्ध पनि मुद्दा अघि बढाइएको थियो।

१९९८ अक्टोबर १२ मा सलमान खान पहिलो पटक पक्राउ परेका थिए र पछि जमानतमा रिहा भएका थिए। त्यसपछि लामो कानुनी प्रक्रियापछि सन् २०१८ अप्रिल ५ मा अदालतले उनलाई काला हिरण शिकार मुद्दामा ५ वर्ष जेल सजाय र १० हजार रुपैयाँ जरिबाना सुनाएको थियो।

हाल उक्त मुद्दा राजस्थान उच्च अदालतमा विचाराधीन अवस्थामा छ। पछिल्लो सुनुवाइ सन् २०२६ मे महिनामा भएको र अर्को सुनुवाइ सन् २०२६ जुलाई १३ का लागि तोकिएको बताइएको छ।

सलमान खान हाल जमानतमा बाहिरै रहेको अवस्थामा यो विवाद फेरि सार्वजनिक बहसको केन्द्र बनेको छ।