एजेन्सी। बलिउड अभिनेता आमिर खानले आफ्नी प्रेमिका गौरी स्प्राटसँग विवाह गर्ने पुष्टि गरेका छन्। अभिनेता स्वयंले विवाह जुलाई ५, २०२६ मा हुने बताएका हुन्।

दुई वर्षभन्दा बढी समयदेखि सम्बन्धमा रहेका आमिर र गौरी अब वैवाहिक जीवन सुरु गर्ने तयारीमा छन्। भेराइटी इण्डियासँगको कुराकानीमा आमिरले स्पष्ट रूपमा भनेका छन्, ‘विवाहको खबर सत्य हो। जुलाई ५ मा हाम्रो विवाह हुँदैछ।’

रिपोर्ट अनुसार उनीहरूले विवाहलाई ठूलो तामझाम बिना पारिवारिक वातावरणमै सम्पन्न गर्ने योजना बनाएका छन्। दुवै जना आफ्नो निजी जीवनलाई अनावश्यक चर्चाबाट टाढा राख्न चाहेकाले भव्य रिसेप्सन वा ठूलो समारोह आयोजना नगर्ने तयारी गरिएको छ।

आमिर खानले सन् २०२५ मा आफ्नो ६० औं जन्मदिनको अवसरमा गौरीसँगको सम्बन्ध सार्वजनिक गरेका थिए। त्यसयता उनले विभिन्न अन्तर्वार्तामा गौरीले आफ्नो जीवनमा शान्ति र स्थिरता ल्याएको बताएका छन्।

यो विवाह आमिर खानको तेस्रो विवाह हुनेछ। यसअघि उनले सन् १९८६ मा फिल्म निर्माता रीना दत्तासँग विवाह गरेका थिए। जुन सन् २००२ मा सम्बन्ध विच्छेदमा टुंगिएको थियो। उनीहरूका दुई सन्तान जुनैद खान र इरा खान छन्।

त्यसपछि आमिरले सन् २००५ मा निर्देशक किरण रावसँग विवाह गरेका थिए। उनीहरूको सम्बन्ध २०२१ मा टुंगिएको हो। उनीहरूका छोरा आजाद राव खान छन्।

सम्बन्ध विच्छेद भए पनि आमिरले रीना र किरण दुवैसँग सम्मानजनक सम्बन्ध कायम राख्दै आएका छन्। र सन्तानको अभिभावकत्व पनि सहमतिमा निभाइरहेका छन्।

गौरी स्प्राट बेंगलुरुकी उद्यमी हुन् र फेसन तथा ब्यूटी क्षेत्रसँग सम्बन्धित व्यवसायमा सक्रिय छिन्। उनी हाल मुम्बईमा बसोबास गर्छिन् र एक छोराकी आमा पनि हुन्।

आमिर र गौरीको चिनजान भने नयाँ होइन। उनीहरू करिब २५ वर्षअघि पहिलो पटक भेटिएको तथ्य पनि सार्वजनिक भएको छ।