काठमाडौं । निर्देशक क्रिस्टोफर नोलनको बहुप्रतीक्षित चलचित्र ‘द ओडिसी’ ले प्रदर्शनको पहिलो सप्ताहन्तमै बक्स अफिसमा उत्कृष्ट प्रदर्शन गर्दै नयाँ कीर्तिमानतर्फ कदम बढाएको छ। उत्तर अमेरिकी बक्स अफिसमा पहिलो स्थान हासिल गरेको चलचित्रले पहिलो दिन शुक्रबार मात्रै ५१ मिलियन अमेरिकी डलर कमाएको थियो।

३ हजार ९१९ प्रदर्शनस्थलमा एकसाथ रिलिज भएको चलचित्रले प्रारम्भिक अनुमानलाई समेत उछिनेको छ। सुरुमा पहिलो सप्ताहन्तमा ९० देखि १०० मिलियन डलरसम्म कमाइ हुने प्रक्षेपण गरिएको भए पनि चलचित्रले आइतबारसम्म उत्तर अमेरिकी बजारबाट मात्रै १२४.५ मिलियन अमेरिकी डलर कमाउन सफल भएको छ।

बक्स अफिस मोजोका अनुसार ‘द ओडिसी’ले विश्वभरबाट पहिलो सप्ताहन्तमै २६४ मिलियन अमेरिकी डलरको व्यापार गरेको छ। योसँगै चलचित्र सन् २०२६ मा पहिलो सप्ताहन्तमै १०० मिलियन डलरभन्दा बढी कमाउने तेस्रो चलचित्र बनेको छ। यसअघि ‘टोय स्टोरी ५’ ले १५९ मिलियन डलर र ‘द सुपर मारियो ग्यालेक्सी मुभी’ ले १३१ मिलियन डलरको ओपनिङ व्यापार गरेका थिए।

करिब २५० मिलियन अमेरिकी डलरको लागतमा निर्माण गरिएको ‘द ओडिसी’ नोलनको करिअरकै सबैभन्दा सफल चलचित्रमध्ये एक बन्ने संकेत देखिएको छ। यद्यपि, नोलनकै सन् २०१२ मा प्रदर्शन भएको ‘द डार्क नाइट राइजेज’ ले पहिलो सप्ताहन्तमा १६० मिलियन डलर कमाउँदै उनको सबैभन्दा ठूलो घरेलु ओपनिङको कीर्तिमान अझै कायम राखेको छ।

नोलनको अघिल्लो सफल चलचित्र ‘ओपेनहाइमर’ ले सन् २०२३ मा पहिलो सप्ताहन्तमा ८२ मिलियन डलर कमाएको थियो। उक्त चलचित्रले प्रदर्शन अवधिभर विश्वभरबाट ९७५ मिलियन डलरभन्दा बढी आम्दानी गर्दै व्यावसायिक र समीक्षात्मक दुवै सफलता हासिल गरेको थियो। ‘द ओडिसी’ले भने पहिलो दिनमै नोलनको सन् २०१४ को चर्चित विज्ञानकथा चलचित्र ‘इन्टरस्टेलर’ को पहिलो सप्ताहन्तको कुल ४७.५ मिलियन डलर कमाइलाई समेत पार गरेको छ।

प्राचीन ग्रीक कवि होमरको प्रसिद्ध महाकाव्यमा आधारित ‘द ओडिसी’ले ट्रोजन युद्धपछि आफ्नो राज्य इथाकातर्फ फर्किने क्रममा वीर योद्धा ओडिसियसले सामना गर्ने चुनौतीपूर्ण यात्रा र संघर्षको कथा प्रस्तुत गर्छ।

चलचित्रमा म्याट डेमन मुख्य भूमिकामा छन्। उनीसँगै टम हल्यान्ड, एन हेथवे, रोबर्ट प्याटिन्सन, लुपिटा न्योङ्गो, जेन्डाया, चार्लिज थेरोन, इलियट पेज, जोन बर्नथल र जोन लेगुइजामोलगायत चर्चित कलाकारहरूको अभिनय रहेको छ।

शानदार सुरुआती व्यापारसँगै ‘द ओडिसी’ यस वर्षको सबैभन्दा ठूलो हलिउड ब्लकबस्टरमध्ये एक बन्ने संकेत देखिएको छ।