धादिङ। भोटेकोशी हुँदै त्रिशूली नदीमा आएको भीषण बाढीले धादिङको गल्छी गाउँपालिका–६ बैरेनी बजारस्थित बागेश्वरी माध्यमिक विद्यालयमा क्षति पुर्‍याएको छ।

बाढीको लेदो विद्यालयको प्रांगणदेखि कक्षाकोठासम्म पसेको छ। कक्षाकोठाभित्र अहिले पनि लेदो जमेको अवस्थामा छ।

भदौ १० गते बिहान विद्यार्थी विद्यालय पुगिसकेका थिए। तर, बाढी आएको खबर फैलिएपछि विद्यालयमा भागदौड मच्चिएको थियो। ज्यान जोगाउने क्रममा विद्यार्थीहरूले आफ्ना झोला कक्षामै छाडेर बाहिरिएका थिए।

बाढीपछि विद्यालय सुनसान बनेको छ भने विद्यार्थीले छाडेका झोला अझै कक्षाकोठामै छन्।

विद्यालयमा अध्ययनरत सबै विद्यार्थी भने सुरक्षित रहेको जनाइएको छ।