पोखरा । नेपाल समाजवादी पार्टीका फणीन्द्र देवकोटा गण्डकी प्रदेशको ऊर्जा, जलस्रोत तथा खानेपानी मन्त्री नियुक्त भएका छन्। उनले बुधबार प्रदेश प्रमुख डिल्लीराज भट्टसमक्ष पद तथा गोपनीयताको शपथ लिएका छन्।

देवकोटा यसअघि २०८१ जेठ र असारमा दुईपटक यही मन्त्रालयको मन्त्री बनेका थिए। माओवादीको ह्वीप उल्लंघन गर्दै मुख्यमन्त्री सुरेन्द्रराज पाण्डेलाई विश्वासको मत दिएपछि पहिलोपटक मन्त्री बनेका उनी माओवादीको कारबाहीमा परेका थिए। सर्वोच्च अदालतको आदेशपछि पुनर्बहाली भएका थिए।

एमाले सरकारबाट बाहिरिएपछि रिक्त भएको भौतिक पूर्वाधार, विकास तथा यातायात व्यवस्था मन्त्रालय र स्वास्थ्य मन्त्रालयको जिम्मेवारी कांग्रेसका नन्दप्रसाद न्यौपानेलाई दिइएको छ। एमालेले छाडेका उद्योग तथा पर्यटन र कृषि, भूमि व्यवस्था तथा सहकारी मन्त्रालय भने मुख्यमन्त्री पाण्डेले आफैँसँग राखेका छन्।

देवकोटाको पुनः नियुक्तिसँगै २०७९ को निर्वाचनमा गोरखाबाट प्रत्यक्ष निर्वाचित चारमध्ये तीन जना सरकारमा पुगेका छन्। गोरखा–२ (ख) का पाण्डे मुख्यमन्त्री, गोरखा–२ (क) का देवकोटा मन्त्री र गोरखा–१ (ख) का न्यौपाने मन्त्री छन्। गोरखा–१ (क) का कृष्णप्रसाद धिताल सभामुख छन्।

५९ सदस्यीय गण्डकी प्रदेशसभामा कांग्रेसका २७ सांसद छन्। देवकोटा र राप्रपाका दुई सांसदको समर्थनसहित मुख्यमन्त्री पाण्डेको पक्षमा ३० सांसद पुगेका छन्।