काठमाडौं । प्रतिनिधिसभाले रसुवाको भोटेकोशीसहित विभिन्न जिल्लामा १० भदौमा आएको विनाशकारी बाढीबाट भएको जनधनको क्षतिप्रति गहिरो दुःख व्यक्त गर्दै विशेष प्रस्ताव सर्वसम्मतिले पारित गरेको छ।

बुधबारको बैठकमा सभामुखले प्रस्तुत गरेको प्रस्तावमा रसुवा, नुवाकोट, धादिङ, चितवन र गोरखाका तटीय क्षेत्रमा बाढीले पुर्‍याएको क्षतिप्रति संसद्ले शोक व्यक्त गरेको हो।

बाढीका कारण रसुवाको टिमुरे, स्याफ्रुबेँसी र बेत्रावती तथा नुवाकोटको त्रिशूली बजार र देवीघाटलगायत क्षेत्र प्रभावित भएका छन्। विपद्मा ठूलो संख्यामा स्वदेशी तथा विदेशी नागरिक बेपत्ता हुनुका साथै धेरैले ज्यान गुमाएका छन्।

प्रतिनिधिसभाले बाढीमा परी ज्यान गुमाउनेहरूप्रति श्रद्धाञ्जली अर्पण गर्दै शोकसन्तप्त परिवारजनप्रति समवेदना व्यक्त गरेको छ। घाइतेहरूको शीघ्र स्वास्थ्यलाभको कामना गर्दै उपचारलाई प्रभावकारी बनाउनसमेत सरकारको ध्यानाकर्षण गराइएको छ।

विशेष प्रस्तावमार्फत बाढीका कारण घरबारविहीन भएका नागरिकको तत्काल सुरक्षित व्यवस्थापन, राहत र दीर्घकालीन पुनःस्थापनाका लागि आवश्यक कदम चाल्न सरकारलाई आग्रह गरिएको छ।