काठमाडाैं। एसीसी प्रिमियर कपको दोस्रो खेलमा नेपाल जीत नजिक पुगेको छ। १०२ रनको सामान्य लक्ष्य पाएको नेपालले यो समाचार तयार पार्दासम्म १८ ओभरको खेल सकिँदा ३ विकेटको क्षतिमा ८७ रन जोडेको छ। 

नेपालका लागि अर्जुन कुमाल ५८ बलमा ३९ रन बनाएर खेलिरहेका छन् भने रोहित पौडेल १५ बलमा १० रन बनाएका छन्।  इशान पाण्डे २० रन बनाएर पेभिलियन फर्किए।  

बाङ्गीस्थित वाइएसडी युकेएम ओभलमा जारी खेलमा टस जितेर पहिले ब्याटिङ गरेको मलेसिया ३२.३ ओभरमा १०१ रनमै अलआउट भएपछि नेपालले १०२ रनको सामान्य लक्ष्य पाएको छ।

मलेसियाका लागि कप्तान सैयद अजिजले सर्वाधिक ३० रन बनाए। अकिल वहिदले २४, विरनदीप सिंहले १४ तथा श्याहदत रम्लीले १३ रन जोडे। अन्य ब्याट्सम्यानले दोहोरो अंकमा रन बनाउन सकेनन्।

नेपालका लागि करण केसीले उत्कृष्ट बलिङ गर्दै चार विकेट लिए। ललित राजवंशीले दुई विकेट लिँदा सन्दीप लामिछाने, हेमन्त धामी र दिपेन्द्रसिंह ऐरीले समान एक–एक विकेट हात पारे।

नेपालले प्रतियोगिताको पहिलो खेलमा बहराइनलाई ७ विकेटले पराजित गरेको थियो। दोस्रो खेलमा पनि नेपाल जित निकाल्दै प्रतियोगितामा आफ्नो पकड बलियो बनाउने लक्ष्यमा छ।