काठमाडौं। एसीसी प्रिमियर कप एकदिवसीय प्रतियोगितामा नेपालले आयोजक मलेसियालाई ६ विकेटले पराजित गरेको छ।

बाङ्गीस्थित वाइएसडी युकेएम ओभलमा मलेसियाले दिएको १०२ रनको सामान्य लक्ष्य नेपालले ४ विकेट गुमाएर पूरा गर्‍यो।

नेपालका लागि अर्जुन कुमालले सर्वाधिक ४५ रन बनाए। उनले ६८ बलमा उक्त रन जोडे। इशान पाण्डेले २० तथा दिपेन्द्रसिंह ऐरीले १२ रन बनाए।

यसअघि टस जितेर पहिले ब्याटिङ गरेको मलेसिया ३२.३ ओभरमा १०१ रनमै अलआउट भएको थियो। मलेसियाका लागि कप्तान सैयद अजिजले ३०, अकिल वहिदले २४, विरनदीप सिंहले १४ तथा श्याहदत रम्लीले १३ रन बनाए।

नेपालका करण केसीले उत्कृष्ट बलिङ गर्दै चार विकेट लिए। ललित राजवंशीले दुई तथा सन्दीप लामिछाने, हेमन्त धामी र दिपेन्द्रसिंह ऐरीले समान एक-एक विकेट लिए।

नेपालले प्रतियोगिताको पहिलो खेलमा बहराइनलाई ७ विकेटले पराजित गरेको थियो। लगातार दोस्रो जितसँगै नेपालले प्रतियोगितामा आफ्नो दाबेदारी बलियो बनाएको छ।