काठमाडौं । रसुवास्थित लाङटाङ खोला जलविद्युत् आयोजनाको सुरुङभित्र खोजीका क्रममा दुई जनाको शव भेटिएको छ।

आयोजनाका महाप्रबन्धक विजयमणि भट्टराईका अनुसार नेपाली सेनाको उद्धार टोलीले सुरुङभित्र प्रवेश गरेर खोजी गर्ने क्रममा दुईवटा शव फेला पारेको हो। शवको पहिचान भने खुल्न बाँकी छ।

सेनाको टोलीले सुरुङभित्र खोजी तथा उद्धारलाई निरन्तरता दिइरहेको छ। भट्टराईका अनुसार सम्भवतः बिहीबार बेलुकासम्म शवको पहिचान खुल्नेछ।

बाढी आउनुअघि नै आयोजनाको विद्युत् प्रवाह बन्द भइसकेकाले अधिकांश कामदार बाहिर निस्किएको हुन सक्ने आयोजनाको अनुमान छ। प्रारम्भिक विवरणअनुसार सुरुङभित्र करिब १५ जना कामदार रहेको अनुमान गरिए पनि वास्तविक संख्या खोजी पूरा भएपछि मात्र यकिन हुने बताइएको छ।

आयोजनामा कार्यरत कुल ६० कर्मचारी तथा कामदारमध्ये १९ जना सम्पर्कमा आइसकेका छन्। अझै ३९ जना सम्पर्कविहीन रहेको आयोजना प्रशासनले जनाएको छ।