काठमाडौं । प्रतिनिधिसभाको बैठक चलिरहेका बेला नेपाली कांग्रेसका सांसद तथा सार्वजनिक लेखा समितिका सभापति भरत खड्का अचानक कुर्सीबाट ढलेका छन्।

खड्का ढलेपछि सभामुखले सांसद सोम शर्मालाई बोल्नबाट रोकेर केही समयका लागि सदनको कारबाही स्थगित गरेका थिए।

डोटीबाट निर्वाचित सांसद खड्कालाई उच्च रक्तचापका कारण चक्कर आएपछि ढलेको बताइएको छ। संसद् सचिवालय स्रोतका अनुसार उनको रक्तचाप १६० पुगेको थियो।

घटनालगत्तै खड्कालाई उपचारका लागि अस्पताल पठाइएको छ। संसद् भवनमै रहेका नेकपा एमालेका प्रमुख सचेतक ऐन महरले उनलाई अस्पताल लगिएको जानकारी दिएका छन्।