काठमाडौं । ‘यदि पुरानो शैलीमा नेतृत्वलाई मन्त्रालयको कुर्सीमा बसेर कागजात समात्ने कुरासँग जोडेर हेर्नुहुन्छ भने, तपाईं गलत युगमा हुनुहुन्छ,’ गृहमन्त्री सुधन गुरुङले स्टन्ट गरेको आरोप लगाउनेहरूलाई जवाफ फर्काउँदै फेसबुकमा लेखेका छन्।

विपद्का बेला फिल्डमा देखिएर ‘स्टन्ट’ गरेको भन्दै आलोचना भइरहेका बेला गुरुङले नेतृत्वलाई मन्त्रालयको कुर्सीमा बसेर कागजात समात्ने कामसँग मात्र जोड्नु ‘पुरानो युगको सोच’ भएको टिप्पणी गरेका हुन्।

उनका अनुसार बाढीपछि उच्चपदस्थ अधिकारीहरूको उपस्थितिमा ‘कमान्ड सेन्टर’ पूर्ण रूपमा सञ्चालनमा छ। अनलाइनमार्फत प्रत्येक चार घण्टामा रणनीतिक बैठक र कमान्ड सञ्चालन भइरहेको उनले बताएका छन्।

‘चिन्ता लिनु पर्दैन, हामी अनलाइनबाटै हरेक चार घण्टामा कमान्ड सञ्चालन र रणनीतिक बैठक गरिरहेका छौँ। टेबल पछाडि बसेर भन्दा डिजिटल माध्यमबाट काम धेरै छिटो र प्रभावकारी भइरहेको छ,’ गुरुङले भनेका छन्।

वर्षौँदेखि फिल्डको वास्तविक अवस्था नबुझी कुर्सीबाट मात्रै नेतृत्व गर्ने पुरानो कार्यशैलीकै कारण अपेक्षित परिणाम आउन नसकेको उनको दाबी छ।

‘उही पुरानै प्रणालीबाट भिन्न र उत्कृष्ट परिणामको आशा गर्दै केही व्यक्तिहरूले अझै पनि हामीलाई त्यही पुरानै शैली अपनाउन दबाब दिएको देख्दा मलाई अचम्म लाग्छ,’ उनले भनेका छन्।

गुरुङले नेतृत्वको मूल्याङ्कन आफू कहाँ बसेर काम गरिरहेको छु भन्ने आधारमा नभई प्राप्त परिणामका आधारमा गर्न आग्रह गरेका छन्।

‘म कहाँ बसेको छु भनेर चिन्ता गर्नुभन्दा परिणाममा ध्यान दिन अनुरोध गर्दछु,’ उनले भनेका छन्।

उनको स्टाटस पढ्नुहोस् :