ओखलढुंगा। भोटेकोशी विपद्का क्रममा सम्पर्कविहीन भएका सिद्धिचरण नगरपालिका-८, सल्लेरीका २७ वर्षीय विशाल तामाङको परिवारसँग पूर्वसांसद रामहरि खतिवडासहितको टोलीले भेट गरेको छ ।

परिवारको अवस्थाबारे जानकारी लिन सिद्धिचरण नगरप्रमुख तेजेन्द्र खनाल र वडा नं. ८ का अध्यक्ष एकराज तामाङसहित खतिवडा तामाङ परिवारको घर पुगेका हुन् ।

भेटका क्रममा विशालका बुवाले छोरा सम्पर्कविहीन भएको लामो समय बितिसक्दा पनि डीएनए परीक्षणको काममा ढिलाइ भइरहेको गुनासो गरे । बेपत्ता छोराको अवस्थाबारे यथाशीघ्र यकिन गरिदिन उनले आग्रह गरेका छन् ।

विशाल विगत तीन वर्षदेखि हाइड्रोपावरमा कार्यरत थिए। भोटेकोशी क्षेत्रमा आएको विपद्पछि उनी परिवारको सम्पर्कमा आएका छैनन्।

परिवारले विशालको खोजी तथा पहिचानको प्रक्रिया छिटो टुंग्याउन सम्बन्धित निकायसँग माग गरेको छ।