बाजुरा। लगातारको वर्षासँगै आएको पहिरोका कारण साँफे-मार्तडी राजमार्ग शनिबार मध्यरातिदेखि अवरुद्ध भएको छ।

जिल्ला प्रहरी कार्यालय बाजुराका प्रहरी निरीक्षक तथा प्रवक्ता गगनसिंह भाटका अनुसार जडाङ्गा, रापक, सुवाकाँध, सेलाघाट तथा मार्तडी कारागारनजिकलगायतका स्थानमा पहिरो खसेपछि सडक अवरुद्ध भएको हो।

पहिरो पन्छाएर सडक खुलाउन सडक डिभिजन कार्यालय साँफेबगरको जेसिबी प्रयोग भइरहेको छ। ठाउँ–ठाउँमा पहिरो गएकाले सडक पूर्णरूपमा सञ्चालनमा आउन भने समय लाग्ने प्रहरीले जनाएको छ।

यसैबीच, लगातारको वर्षाका कारण बाजुरामा विद्युत् सेवा पनि अवरुद्ध भएको छ। नेपाल विद्युत् प्राधिकरण वितरण केन्द्र बाजुराका अनुसार शनिबार मध्यराति १२ बजेदेखि विद्युत् सेवा ठप्प छ।

वर्षासँगै विभिन्न स्थानमा पहिरो खस्दा विद्युत्का पोल ढलेका कारण सेवा अवरुद्ध भएको हो। विद्युत् सेवा पुनः सञ्चालनका लागि आवश्यक मर्मतको काम भइरहेको जनाइएको छ।