काठमाडौं । स्थानीय तहमा हुने अनियमितता र भ्रष्टाचारसम्बन्धी उजुरीमा काठमाडौं महानगरपालिका सबैभन्दा अगाडि देखिएको छ।

अख्तियार दुरुपयोग अनुसन्धान आयोगका अनुसार आर्थिक वर्ष २०८२/८३ मा काठमाडौं महानगरपालिकासँग सम्बन्धित ४४१ वटा उजुरी परेका छन्।

आयोगमा सबैभन्दा धेरै उजुरी परेका १० स्थानीय तहको विवरण विश्लेषण गर्दा काठमाडौं महानगरसँग सम्बन्धित उजुरीको संख्या अन्य स्थानीय तहको तुलनामा बढी देखिएको हो।

काठमाडौं महानगरपछि पोखरा महानगरपालिका उजुरीको संख्याका आधारमा दोस्रो स्थानमा छ। त्यसपछि धनुषाको विदेह नगरपालिका, पर्साको छिपहरमाई गाउँपालिका, धनुषाको जनकपुर उपमहानगरपालिका र सिरहाको सिरहा नगरपालिका रहेका छन्।

त्यस्तै, बाराको जितपुर सिमरा उपमहानगरपालिका, सुवर्ण गाउँपालिका, पर्साको वीरगञ्ज महानगरपालिका र बाराको पचरौता नगरपालिका पनि धेरै उजुरी परेका स्थानीय तहको सूचीमा छन्।

आयोगका प्रवक्ता तथा सहसचिव सुरेश न्यौपानेका अनुसार आर्थिक वर्ष २०८२/८३ मा आयोगमा परेका उजुरीको विश्लेषणबाट स्थानीय तहसम्बन्धी उजुरीमा यस्तो अवस्था देखिएको हो।

आयोगमा परेको उजुरी आफैंमा भ्रष्टाचार प्रमाणित भएको अर्थ नलाग्ने भएकाले सम्बन्धित उजुरीमाथि छानबिन र अनुसन्धानपछि मात्रै आरोप पुष्टि वा खारेज हुने आयोगको प्रक्रियाअनुसार बुझ्नुपर्ने हुन्छ।