काठमाडौं । भोटेकोशीको बाढीपछि त्रिशूली नदीमा बहाव बढेको छ। नुवाकोटको तारकेश्वर गाउँपालिकाका तारुकाघाट र दर्शनटारमा नदी कटान तीव्र बनेको छ।

कटानले दर्जनौँ घर जोखिममा परेका छन्। केही घर आंशिक रूपमा बगिसकेका छन्।

नदीले बस्ती र खेतबारीतर्फ धमाधम जमिन काटिरहेको छ। बहाव बढेसँगै कटान थप फैलिँदै गएको स्थानीयले बताएका छन्।

धादिङको गल्छी हुँदै नुवाकोटको देवीघाट पुग्ने सडक आसपास पनि कटानको असर देखिएको छ। नदी किनारका घर, खेतबारी र अन्य संरचना जोखिममा छन्।

बाढीपछि नदीमा ढुंगा, बालुवा र माटो थुप्रिएको छ। त्यसले कतिपय ठाउँमा नदीको धारसमेत परिवर्तन गरेको छ। स्थानीयका अनुसार यसले कटानको जोखिम झनै बढाएको छ।

कटान रोक्न तत्काल तटबन्ध निर्माण गर्नुपर्ने स्थानीयको माग छ। जोखिममा रहेका परिवारलाई सुरक्षित स्थानमा सार्न पनि उनीहरूले आग्रह गरेका छन्।

दीर्घकालीन रूपमा नदी नियन्त्रणको योजना बनाउनुपर्ने स्थानीयको भनाइ छ। प्रभावित क्षेत्रको स्थलगत निरीक्षण गरी जोखिममा रहेका बस्ती पहिचान गर्नुपर्ने अवस्था छ।

भोटेकोशी बाढीपछि त्रिशूली आसपासको क्षतिको यकिन विवरणसमेत संकलन गर्नुपर्ने देखिएको छ। स्थानीय तह, जिल्ला प्रशासन र सम्बन्धित निकायले तत्काल सुरक्षा उपाय अघि बढाउनुपर्ने माग भइरहेको छ।