काठमाडौं । दसैँ–तिहार नजिकिँदै गएसँगै काठमाडौं उपत्यकाका चङ्गा पसलमा चहलपहल बढ्न थालेको छ।

टेङ्गल चोकदेखि उपत्यकाका विभिन्न बजारमा रंगीचंगी चङ्गा, लट्टाई र धागो सजिन थालेका छन्। ग्राहकहरू मूल्य बुझ्न र चङ्गा किन्न पसल पुग्न थालेका छन्।

दसैँको छुट्टीमा परिवार र साथीभाइसँग चङ्गा उडाउने पुरानो चलन अझै कायम छ। यही कारण दसैँ नजिकिँदा चङ्गाको माग बढ्ने गरेको व्यवसायी बताउँछन्।

टेङ्गल चोकस्थित ‘भुतमाली पस’ अर्थात् ‘द काइट सप’का सञ्चालक विपीनराज वैद्यले दसैँ–तिहारका लागि चङ्गा आयात सुरु भइसकेको बताए। उनका अनुसार अब बजारमा माग क्रमशः बढ्दै जानेछ।

‘चुनौती बजारका लागि छैन, मौसमले गर्दा हुन्छ,’ २४ वर्षदेखि चङ्गाको व्यापार गर्दै आएका वैद्यले भने, ‘पानी पर्‍यो भने बिक्री भए पनि नाफा कम हुन्छ।’

नेपालमा बिक्री हुने अधिकांश चङ्गा भारतबाट आउने गरेका छन्। कलकत्ता, जयपुर, बनारस र बरेलीलगायत भारतीय सहरबाट चङ्गा तथा धागो आयात हुने गरेको व्यवसायी वैद्यले बताए।

चङ्गासँगै विभिन्न लम्बाइका धागो पनि बिक्रीमा छन्। ६ देखि १ हजार मिटरसम्मका धागो पाइने र कतिपयको मूल्य २ हजार ५ सय रुपैयाँसम्म पर्ने उनले बताए।

सिजनमा काठमाडौं उपत्यकाबाहेक बुटवल, धरान, धनकुटालगायतका ठाउँमा पनि चङ्गा पठाउने गरिएको छ। विदेशमा रहेका नेपालीलाई लक्षित गर्दै अष्ट्रेलिया, अमेरिका र बेलायतसम्म समेत चङ्गा पठाउने गरेको वैद्यले बताए।

चराचुरुंगीलाई असर गर्ने भएकाले आफ्नो पसलबाट नाइलनको धागो बिक्री गर्न छाडेको उनको भनाइ छ।

व्यवसायी वैद्यका अनुसार नेपालमै ठूलो परिमाणमा चङ्गा उत्पादन गर्न सके भारतबाट आयात गरिनेभन्दा सस्तो पर्न सक्छ।

‘अहिले थोरै उत्पादन हुन्छ, त्यसले गर्दा मूल्य धेरै हुन्छ। यहीँ ठूलो उत्पादन गर्न सके सस्तो पर्छ,’ उनले भने।

तर मूल्य र बजारको अवस्थाका कारण नेपालमा चङ्गाको व्यावसायिक उत्पादन विस्तार हुन नसकेको उनको बुझाइ छ।

मोबाइल, सामाजिक सञ्जाल र डिजिटल मनोरञ्जनको प्रभाव बढे पनि दसैँमा चङ्गा उडाउने संस्कृति भने हराइसकेको छैन। बाल्यकालको सम्झनासँग जोडिएको चङ्गा उडाउने परम्परा नयाँ पुस्तामा पनि कुनै न कुनै रूपमा देखिन्छ।

दसैँका मुख्य दिन नजिकिँदै जाँदा चङ्गाको बिक्री अझ बढ्ने व्यवसायीको अपेक्षा छ।