काठमाडौं। संघीय संसद् भवनमा प्रतिनिधिसभा सदस्यहरूका लागि सञ्चालित क्यान्टिन सोमबारको बैठकमा महँगीको विषय उठेको भोलिपल्टै बन्द भएको छ।

राष्ट्रिय स्वतन्त्र पार्टीका सांसद खगेन्द्र सुनारले सोमबार प्रतिनिधिसभाको बैठकमा संसद् भवनसहित सिंहदरबारभित्र सञ्चालित क्यान्टिनको महँगीबारे प्रश्न उठाएका थिए। त्यसको भोलिपल्टै प्रतिनिधिसभा सदस्यका लागि सञ्चालित क्यान्टिन बन्द गरिएको हो।

सांसद सुनारले न्यून तलबमा काम गर्ने कर्मचारी र सुरक्षाकर्मीका लागि सिंहदरबारभित्रको खाना तथा खाजा महँगो भएको बताएका थिए।

उनले सिंहदरबारभित्रका क्यान्टिन व्यवस्थित नभएको र खाना तथा खाजाको मूल्यसमेत सर्वसाधारण तथा कर्मचारीको पहुँचअनुकूल हुनुपर्ने बताएका थिए।

‘सिंहदरबारभित्र फाइभ स्टार होटलको शैलीमा क्यान्टिन चलाउनु हुँदैन,’ उनले भनेका थिए, ‘यहाँका तल्लो तहका कर्मचारी र मर्यादापालकहरूका लागि ३०–३५ हजारको तलबमा दिनभरको चिया–खाजा खर्च धान्न कठिन छ।’

सुनारले सिंहदरबारभित्र जथाभावी खुलेका क्यान्टिन, त्यहाँबाट निस्कने गन्ध र फोहोर व्यवस्थापनप्रति समेत प्रश्न उठाएका थिए।

उनले सिंहदरबार परिसरलाई थप व्यवस्थित र सफा बनाउनुपर्ने भन्दै शाकाहारी क्षेत्रका रूपमा विकास गर्नुपर्ने धारणा पनि राखेका थिए।

प्रतिनिधिसभा सदस्यका लागि सञ्चालन गरिएको क्यान्टिन किन बन्द गरिएको हो भन्नेबारे भने औपचारिक कारण सार्वजनिक भइसकेको छैन।

सांसद सुनारले क्यान्टिनको महँगीसँगै राजदूत नियुक्तिको मापदण्ड र प्रहरीभित्रको अनियमितताको विषयमा पनि धारणा राखेका थिए। राजदूत नियुक्तिमा सरकारले बनाएको कार्यविधि पालना हुनुपर्ने उनको भनाइ थियो।

त्यस्तै, म्यादी प्रहरीका लागि खरिद गरिएको जुत्तामा अनियमितता भएको दाबी गर्दै उनले त्यसबारे प्रमाण संकलन भइरहेको बताएका थिए।