काठमाडौं। काठमाडौँको वसन्तपुरमा इन्द्रजात्राको रौनक सुरु भएको छ।

येँया पर्वको विधिवत सुरुवातको अवसरमा हनुमानढोका दरबार क्षेत्रमा परम्परागत देवप्याखँ अर्थात् देवी नाच प्रदर्शन गरिएको छ।

इन्द्रजात्राको पहिलो दिन ३६ हात लामो काठको लिङ्गो अर्थात् योसिं उठाउने क्रममा देवी नाच प्रस्तुत गरिएको हो।

नाचमा सहभागी कलाकारले विभिन्न देवीदेवता तथा दैत्यका मुकुन्डो लगाएका थिए। धिमे र भुस्या बाजाको तालसँगै प्रस्तुत गरिएको नाच हेर्न वसन्तपुरमा स्थानीय तथा विदेशी पर्यटकको भीड लागेको थियो।

वसन्तपुरस्थित शिव–पार्वती मन्दिरको प्राङ्गणमा प्रदर्शन गरिएको यो ऐतिहासिक नाच इन्द्रजात्राको प्रमुख सांस्कृतिक आकर्षणमध्ये एक हो।

इन्द्रजात्रा सुरु हुनुअघिदेखि नै हनुमानढोका, मरु तथा आसपासका क्षेत्रमा चहलपहल बढेको छ। जात्राको रौनकसँगै राजधानीको पुरानो बस्ती नेवारी संस्कृति र परम्पराको रंगमा रंगिन थालेको छ।