काठमाडौं । ऐतिहासिक वसन्तपुर दरबार क्षेत्रमा सामूहिक कुमारी पूजा आयोजना हुँदैछ। पूजाका लागि नेवार समुदायका बालिकालाई परम्परागत विधिअनुसार सजाएर तयार पारिएको छ।

कुमारी पूजामा सहभागी हुने बालिकालाई रातो पोशाक, पगरी तथा मुकुट र सुनका परम्परागत गहनाले सजाइएको छ। उनीहरूको निधारमा त्रिनेत्र र रातो टीका लगाइएको छ भने आँखामा गाजल लगाइएको छ।

सामूहिक कुमारी पूजा नेवार समुदायमा धार्मिक तथा सांस्कृतिक महत्त्व बोकेको परम्परा हो। पूजाका क्रममा बालिकालाई कुमारीका रूपमा पूजा गर्ने गरिन्छ।

कुमारी पूजा गरे देवीको आशीर्वाद प्राप्त हुने, रोगव्याधि निको हुने, विघ्नबाधा हट्ने तथा सुख, शान्ति र समृद्धि प्राप्त हुने धार्मिक विश्वास छ।

पूजाका लागि बालिकालाई परम्परागत वेशभूषामा सजाएर वसन्तपुर क्षेत्रमा ल्याउने क्रमसँगै त्यहाँ सांस्कृतिक चहलपहल बढेको छ।