काठमाडौं । मौसममा आएको बदलावसँगै देशका विभिन्न क्षेत्रमा वर्षा भइरहेको छ। आगामी केही दिन भारी वर्षाको सम्भावना रहेकाले नदी तथा खोलाको बहाव बढ्ने, बाढी, पहिरो र डुबानको जोखिमसमेत बढेको छ।

विशेषगरी बर्दिया, गोरखा, मकवानपुर र गुल्मीका विभिन्न क्षेत्रमा वर्षाको जोखिम देखिएको छ। स्थानीय प्रशासनले नदी तथा खोलाको तटीय क्षेत्रमा बसोबास गर्ने नागरिकलाई सतर्क रहन आग्रह गरेका छन्।

बर्दियामा कर्णाली, बबई, भादा र ओराही नदी तथा खोलाको तटीय क्षेत्रमा डुबानको जोखिम रहेको प्रशासनले जनाएको छ।

नदीको बहाव बढ्न सक्ने भएकाले तटीय क्षेत्रका बासिन्दालाई उच्च सतर्कता अपनाउन भनिएको छ।

गोरखा प्रशासनले आइतबारसम्म भारी वर्षा हुन सक्ने भन्दै उच्च सतर्कता अपनाउन आग्रह गरेको छ।

वर्षाका कारण नदी तथा खोलाको बहाव बढ्नुका साथै बाढी, पहिरो, गेग्रान र डुबानको जोखिम रहेको प्रशासनले जनाएको छ। जोखिमयुक्त क्षेत्रका नागरिकलाई सुरक्षित स्थानतर्फ जान आवश्यक तयारी अवस्थामा रहनसमेत भनिएको छ।

मकवानपुरमा सम्भावित भारी वर्षाका कारण जोखिम न्यूनीकरणका लागि विभिन्न स्थानीय तहले विद्यालय बन्द गरेका छन्।

मनहरी र थाहा नगरपालिकाले विद्यालय बिदा दिएका छन्। यसअघि राक्सिराङ र इन्द्रसरोवर गाउँपालिकाले पनि दुई दिनका लागि विद्यालय बन्द गर्ने निर्णय गरेका थिए।

कुलेखानी जलाशय आसपास पनि सम्भावित जोखिमलाई ध्यानमा राखेर तयारी बढाइएको छ। जलाशयको तल्लो तटीय क्षेत्रमा साइरन जडान गरिएको छ।

गुल्मीका इस्मा, कालीगण्डकी र मदाने गाउँपालिकाले पनि भारी वर्षाको सम्भावनालाई ध्यानमा राखेर बिहीबार र शुक्रबार विद्यालय बन्द गरेका छन्।

स्थानीय तहले विद्यार्थीको सुरक्षा र सम्भावित विपद्को जोखिमलाई ध्यानमा राख्दै शैक्षिक संस्था बन्द गर्ने निर्णय गरेका हुन्।

भारी वर्षाको समयमा नदी तथा खोलाको बहाव अचानक बढ्न सक्ने भएकाले तटीय क्षेत्रमा बसोबास गर्ने नागरिकलाई सावधानी अपनाउन आग्रह गरिएको छ।

पहाडी क्षेत्रमा भने वर्षासँगै पहिरो र गेग्रान बग्ने जोखिम रहन्छ। त्यसैले घर वरिपरि जमिन चिरिएको, धसिएको वा अस्वाभाविक रूपमा फुलेको देखिए तत्काल सुरक्षित स्थानमा जान आवश्यक हुन्छ।

प्रशासनले जोखिमयुक्त क्षेत्रका नागरिकलाई मौसमसम्बन्धी सूचना निरन्तर हेर्न र स्थानीय प्रशासन तथा सुरक्षा निकायको निर्देशन पालना गर्न आग्रह गरेको छ।