काठमाडौं। मनसुनी वायु र पश्चिमी वायुको आंशिक प्रभावसँगै बंगालको खाडीमा विकसित गहिरो न्यूनचापीय प्रणालीको असर नेपालमा देखिएको छ। काठमाडौं उपत्यकासहित देशका अधिकांश भूभागमा बिहीबार बिहानैदेखि वर्षा भइरहेको छ।

मौसम पूर्वानुमान महाशाखाका अनुसार कोशी, मधेश, बागमती, गण्डकी, लुम्बिनी र कर्णाली प्रदेशमा बिहानैदेखि अधिकांश भूभागमा बदली छ। सुदूरपश्चिम प्रदेशमा भने आंशिक बदली रहेको छ।

कोशी, मधेश र बागमती प्रदेशका धेरै स्थानमा वर्षा भइरहेको छ। गण्डकी र लुम्बिनी प्रदेशका केही स्थानमा पनि वर्षा जारी छ। लगातारको वर्षाका कारण काठमाडौं उपत्यकासहित विभिन्न क्षेत्रमा जनजीवन प्रभावित भएको छ।

महाशाखाका अनुसार बिहीबार राति कोशी, बागमती, गण्डकी र लुम्बिनी प्रदेशका थोरै स्थानमा भारीदेखि धेरै भारी वर्षा हुन सक्ने सम्भावना छ। मधेश प्रदेशका एक–दुई स्थानमा पनि भारी वर्षाको सम्भावना रहेको छ।

तराईका केही भूभागमा हावाहुरीसमेत चल्न सक्ने पूर्वानुमान गरिएको छ। मधेश, कोशी, बागमती, गण्डकी र लुम्बिनी प्रदेशका तराई क्षेत्रमा हावाहुरीसहित वर्षा हुन सक्ने भएकाले आवश्यक सावधानी अपनाउन महाशाखाले आग्रह गरेको छ।

बंगालको खाडीमा विकसित गहिरो न्यूनचापीय क्षेत्र भारतको उत्तर आन्ध्र प्रदेश र दक्षिण ओडिशाको तट पार गरेर उत्तरपश्चिमतर्फ सर्ने क्रममा छ। यही मौसमी प्रणालीको प्रभाव नेपालमा समेत परेको मौसमविद्हरूले बताएका छन्।

मनसुनी वायु कमजोर हुँदै गएको अवस्थामा पश्चिमी वायु र बंगालको खाडीबाट आएको मौसमी प्रणालीको प्रभाव एकैपटक देखिँदा देशका विभिन्न भागमा वर्षा भइरहेको हो।

लगातारको वर्षासँगै नदी तथा खोलानालामा पानीको सतह बढ्न सक्ने जोखिम रहेको महाशाखाले जनाएको छ।

विशेषगरी पहाडी तथा भिरालो क्षेत्रमा वर्षा थपिए पहिरो जाने र सडक अवरुद्ध हुने सम्भावना छ। कमजोर भूभागमा पानीको बहाव बढ्दा स्थानीय खोलानालामा आकस्मिक बाढी आउन सक्ने जोखिमसमेत रहन्छ।

वर्षाका कारण सडक तथा यातायात प्रभावित हुन सक्ने भएकाले यात्रा गर्दा मौसमको अवस्था बुझ्न र जोखिमयुक्त क्षेत्रमा सावधानी अपनाउन आग्रह गरिएको छ।

महाशाखाले भारी वर्षा हुने सम्भावना भएका क्षेत्रमा रहेका नागरिकलाई नदी, खोला र पहिरोको जोखिम भएका स्थानमा विशेष सतर्कता अपनाउन अनुरोध गरेको छ।