काठमाडौं। रसुवाको भोटेकोशीमा विनाशकारी बाढी आएको एक महिना पूरा भएको छ। तर, बाढीमा बेपत्ता भएकाहरूको खोजी अझै टुंगिएको छैन। अनुमानित ५ हजार २८५ जना अझै बेपत्ता रहेको बताइएको छ।

बाढीपछि बेपत्ताको खोजी र शवको पहिचानमा सहज होस् भनेर परिवार र आफन्तले काठमाडौँको महाराजगञ्जस्थित त्रिवि शिक्षण अस्पताल र राष्ट्रिय ट्रमा सेन्टरका भित्तामा फोटोसहितका सूचना टाँसेका थिए।

एक महिनापछि ती भित्ताको अवस्था भने फेरिएको छ। हराएकाहरू भेटिएका छैनन्, तर उनीहरूलाई खोज्दै टाँसिएका फोटो घाम र पानीले उप्किन, खुइलिन र च्यातिन थालेका छन्।

घटनालगत्तै झिनो आशा बोकेर भित्तामा टाँसिएका ती तस्बिरमध्ये केहीसँग जोडिएका परिवारले कुशको शव बनाएर बेपत्ताको अन्त्येष्टिसमेत गरिसकेका छन्। तर, केही तस्बिर भने अझै अस्पतालका भित्तामै छन्। ती तस्बिरमा रहेका अनुहार हराएकाको खबर पर्खिरहेका परिवारका लागि अझै एउटा अधुरो प्रश्नजस्तै छन्।

बाढीमा परेका १ हजार ४५३ जनाको शव भेटिएको छ। शव भेटिए पनि धेरैको अझै पहिचान हुन सकेको छैन। बेपत्ताको पहिचानका लागि हालसम्म २ हजार ६० जनाको डीएनए नमुना संकलन गरिएको छ।

बाढी गएको एक महिना बितिसक्दा खोजी र पहिचानको प्रक्रिया जारी छ। तर, अस्पतालका भित्तामा घामपानीले खुइलिँदै गरेका ती फोटोले भने बेपत्ताको पर्खाइ अझै सकिएको छैन भन्ने देखाइरहेका छन्।