म्याग्दीमा कालीगण्डकी नदीमा आएको बाढीले बेनी-जोमसोम-कोरला सडकअन्तर्गतको एक पुल बगाएपछि कोरला नाकासँगको यातायात सम्पर्क टुटेको छ।

अन्नपूर्ण गाउँपालिका-६ पोखरेबगर र वडा नम्बर २ भुरुङ्ग-तातोपानीको नौलीबगर जोड्ने पुल कालीगण्डकीले बगाएको हो।

रसुवाको भोटेकोशीमा आएको बाढीपछि मुख्य सडकमार्ग अवरुद्ध हुँदा वैकल्पिक मार्गका रूपमा प्रयोग हुँदै आएको यो सडकखण्डसमेत बाढी र पहिरोका कारण अवरुद्ध भएको छ।

अन्नपूर्ण गाउँपालिकाका अध्यक्ष भारतकुमार पुनका अनुसार पुल बगेसँगै गाउँपालिकाका वडा नम्बर २, ३ र ४ तथा मुस्ताङसँगको यातायात सम्पर्क विच्छेद भएको छ।

यस्तै, अन्नपूर्ण गाउँपालिका-५ गिवाङमा एउटा र वडा नम्बर ३ को फगाममा अर्को घर पहिरोमा पुरिएको छ। पुरिएका घरमा रहेका दुई जनाको खोजी भइरहेको छ।

बेनी-जोमसोम सडकअन्तर्गत खामभित्तामा समेत कालीगण्डकीले सडक कटान गरेको छ भने अन्नपूर्ण गाउँपालिका-४ घरापस्थित निलगिरि आधारभूत विद्यालयमा पनि क्षति पुगेको छ।