मुगु। मुगु र हुम्लाको सीमावर्ती क्षेत्रमा जडीबुटी संकलन गर्ने क्रममा स्थानीयबीच झडप भएपछि भाग्ने क्रममा एक जनाको मृत्यु भएको छ। घटनापछि दुई जना अझै बेपत्ता छन्।

मुगुम कार्मारोङ गाउँपालिका र हुम्लाको चंखेली गाउँपालिकाको सीमावर्ती मिमी सामुदायिक वनमा घटना भएको हो। जडीबुटी संकलनका लागि २ असोजमा घरबाट निस्किएका १३ जनामध्ये १० जना सम्पर्कमा आइसकेका छन्।

मुगुका प्रमुख जिल्ला अधिकारी पोषनराज भण्डारीका अनुसार जडीबुटी संकलनका क्रममा दुई पक्षका स्थानीयबीच विवाद भएको थियो। विवादपछि भागेर फर्किने क्रममा एक जनालाई लेक लागेपछि मृत्यु भएको प्रारम्भिक जानकारी आएको छ।

मिमी वन क्षेत्रमा वनको सीमासम्बन्धी विवादसमेत रहेको बताइएको छ। चंखेली गाउँपालिका–२ हुँदै कार्मारोङ–७ को मिमी वन क्षेत्रमा पुगेका उनीहरू त्यहाँ जडीबुटी संकलन गर्ने क्रममा स्थानीयसँग विवादमा परेको प्रशासनको भनाइ छ।

मृत्यु हुनेमा मुगुम कार्मारोङ गाउँपालिका–९ का २२ वर्षीय गणेशबहादुर बुढा रहेको प्रजिअ भण्डारीले जानकारी दिए। घटनास्थलबाट शव तल झारिएको छ भने पोस्टमार्टमका लागि जिल्ला अस्पताल ल्याउने तयारी भइरहेको छ।

सुरुमा नौ जना सम्पर्कविहीन रहेको जानकारी आए पनि खोजीका क्रममा सात जना सम्पर्कमा आएका थिए। अहिले दुई जना बेपत्ता रहेको प्रशासनले जनाएको छ।

बेपत्ताको खोजीका लागि मुगु र हुम्लाका जिल्ला प्रशासन तथा प्रहरी कार्यालयबीच समन्वय भइरहेको छ। दुवै जिल्लाबाट खोजी टोली परिचालन गरिएको बताइएको छ।

घटनाबारे थप अनुसन्धान भइरहेको प्रमुख जिल्ला अधिकारी भण्डारीले बताएका छन्।