काठमाडौं। त्रिभुवन अन्तर्राष्ट्रिय विमानस्थलमा अन्डरवेयरभित्र लुकाएर ल्याएको ४२२.५ ग्राम सुनजस्तो देखिने पहेँलो धातुसहित एक भारतीय नागरिक पक्राउ परेका छन्।

भारतको मुम्बईबाट इन्डिगो एयरको उडानमार्फत काठमाडौं आएका दिल्लीका करिब ४६ वर्षीय अस्लम शौकतलाई विमानस्थलमा अस्वाभाविक गतिविधि गरिरहेको अवस्थामा प्रहरीले शंका लागेर जाँच गरेको थियो।

जाँचका क्रममा उनको अन्डरवेयरभित्र प्लास्टिकले बेरेर लुकाइएको ४२२.५ ग्राम पहेँलो धातु फेला परेको प्रहरीले जनाएको छ। दुईवटा गोलाकार अर्धठोस अवस्थामा रहेको उक्त धातु सुन भएको प्रारम्भिक दाबी गरिएको छ।

प्रहरीका अनुसार उनलाई आइतबार दिउँसो विमानस्थलमा नियन्त्रणमा लिइएको हो। पक्राउ परेका शौकतलाई थप अनुसन्धान तथा आवश्यक कारबाहीका लागि प्रहरी वृत्त गौशाला पठाइएको छ।

बरामद धातुको वास्तविक प्रकृति तथा सुनको शुद्धतासम्बन्धी परीक्षण र थप अनुसन्धानपछि आवश्यक कानुनी प्रक्रिया अघि बढाइनेछ।