पोखरा । पोखराको मुख्य व्यापारिक केन्द्र न्यूरोड अब आकाशमा झुन्डिएका गुजुल्टिएका तारबाट मुक्त हुने क्रममा छ। आधुनिक र व्यवस्थित सहर बनाउने योजनाअन्तर्गत सडकका विद्युत् तार जमिनमुनि लैजाने काम तीव्र पारिएको छ।

नेपाल विद्युत् प्राधिकरणको ‘पोखरा–भरतपुर वितरण प्रणाली सुदृढीकरण आयोजना’ अन्तर्गत भारतीय कम्पनी टाटा प्रोजेक्ट्स लिमिटेडले करिब १ अर्ब ३० करोड रुपैयाँ लागतमा तार भूमिगत गर्ने काम गरिरहेको छ।

कुँडहरदेखि पृथ्वीचोक र विमानस्थल क्षेत्रसम्म अन्डरग्राउण्ड लाइनबाट विद्युत् प्रवाहसमेत सुरु भइसकेको छ। अहिले न्यूरोड, सिर्जनाचोक र लेकसाइड क्षेत्रमा काम धमाधम भइरहेको छ।

आयोजना पूरा भएपछि पोखराको मुख्य सहरी क्षेत्रमा पर्ने करिब २३ किलोमिटर सडकमा रहेका विद्युत्का तार जमिनमुनि पुग्नेछन्।

यससँगै सडक र बजार क्षेत्रमा देखिने तारको जाल हट्नेछ भने पोखराको सहरी सौन्दर्य र विद्युत् वितरण प्रणालीसमेत थप व्यवस्थित हुने अपेक्षा गरिएको छ।

Scanned-Image