काठमाडौं। सम्पत्ति शुद्धीकरण तथा बैंकिङ कसुरको मुद्दामा पुर्पक्षका लागि नख्खु कारागारमा रहेका व्यवसायी दीपक भट्टलाई रातारात सिन्धुपाल्चोक पुर्‍याइएको छ।

थुनामा रहेका भट्टलाई कारागार व्यवस्थापन विभागको आदेशमा शनिबार साँझै स्थानान्तरण गरिएको हो।

सरुवा भयो, तर किन भयो ? यसको स्पष्ट जवाफचाहिँ कारागार प्रशासनले दिएको छैन।

भट्टको सरुवा त्यतिबेला भएको छ, जतिबेला पूर्वप्रधानन्यायाधीश चोलेन्द्रशमशेर जबरासँग जोडिएको सम्पर्क र गतिविधिबारे प्रहरीको अनुसन्धान चलिरहेको छ। यही कारण भट्टको सरुवालाई सामान्य प्रशासनिक निर्णय मात्रै मान्न नहुने स्रोतको दाबी छ।

अनुसन्धानका क्रममा जबरासँग निकट भनिएका इनम सापकोटामार्फत भट्ट र अर्का व्यवसायी सुलभ अग्रवालसँग सम्पर्क हुने गरेको तथ्य खुलेको प्रहरी स्रोतको दाबी छ। यही कनेक्सन खोतल्ने क्रममा सापकोटालाई प्रहरीले त्रिभुवन विमानस्थलबाट नियन्त्रणमा लिएर मोबाइल जाँचदेखि बयानसम्म लिएको थियो।

नयाँ दिल्ली हुँदै दुबई उड्न लागेका सापकोटालाई केहीबेर सोधपुछ गरेपछि प्रहरीले छाड्यो। तर, उनले दिएको सूचनाले प्रहरीको अनुसन्धानको घेरा भने फराकिलो बनाएको बताइन्छ।

स्रोतका अनुसार सापकोटासँगको सोधपुछपछि जबरा, भट्ट र अग्रवालबीचको सम्पर्कबारे प्रहरीले थप जानकारी पाएको छ। त्यसैको बीचमा नख्खुमा रहेका भट्टलाई सिन्धुपाल्चोक सारिएपछि सरुवाको कारणमाथि प्रश्न उठेको हो।

यद्यपि, सम्पर्क हुनु नै अपराध होइन। जबरा, भट्ट र अग्रवालबीचको भनिएको सम्पर्कबाट गैरकानुनी काम भएको हो कि होइन भन्ने पनि अहिलेसम्म पुष्टि भएको छैन।

भट्ट यसअघि डिल्लीबजारबाट नख्खु पुगेका थिए। अहिले नख्खुबाट सिन्धुपाल्चोक। कारागार फेरिएसँगै भट्टलाई कहाँ राख्ने भन्ने निर्णय मात्रै हो कि यसपछाडि अरू कुनै ‘कनेक्सन’ पनि छ? भन्ने चासो सर्वत्र बढेको छ।

कारागार व्यवस्थापन विभागले भने सरुवाको औपचारिक कारण सार्वजनिक गरेको छैन। विभागको पत्रका आधारमा सक्कल फाइल र आवश्यक कागजातसहित भट्टलाई सुरक्षा घेरामा सिन्धुपाल्चोक पठाइएको नख्खु कारागारले जनाएको छ।

भट्टविरुद्ध सम्पत्ति शुद्धीकरण, भ्रष्टाचार तथा बैंकिङ कसुरसम्बन्धी मुद्दा विचाराधीन छन्।अब उनको पछिल्लो सरुवा नियमित प्रशासनिक प्रक्रिया थियो वा जबरा प्रकरणसँग जोडिएको अर्को कडी, त्यसको जवाफ भने अनुसन्धानले नै देला।