डोटी । प्रियङ्का श्रेष्ठको आत्महत्या दुरुत्साहनसम्बन्धी कसुरमा पक्राउ परेका सागर श्रेष्ठलाई डोटी जिल्ला अदालतले पुर्पक्षका लागि थुनामा पठाउने आदेश दिएको छ।

जिल्ला अदालतका न्यायाधीश पदमराज पाण्डेको इजलासले बुधबार थुनछेक बहसपछि उनलाई मुद्दाको अन्तिम टुंगो नलागेसम्म थुनामा राख्न आदेश दिएको हो।

प्रियङ्का र सागरबीच विगत तीन वर्षदेखि प्रेम सम्बन्ध रहेको थियो। २०८३ भदौ ३० गते आफ्नो जन्मदिनका दिन प्रियङ्का दिपायल सिलगढी नगरपालिका–३ स्थित पुलबजारको सेती नदीमाथिको झोलुङ्गे पुलमा पुगेकी थिइन्। दिउँसो करिब ४ः५० देखि ५ बजेको बीचमा उनी पुलको जालीमाथि चढेर नदीमा हाम फालेकी थिइन्।

घटनाको आठ दिनपछि, असोज ७ गते बिहान ११ः१० बजे कैलालीको टीकापुर नगरपालिका–२, मूलपानीस्थित कर्णाली नदीको पश्चिम किनारमा प्रियङ्काको शव फेला परेको थियो। पोस्टमार्टम प्रतिवेदनमा उनको मृत्यु डुबेर भएको उल्लेख छ।

प्रियङ्काका बुबा चन्द्र श्रेष्ठले सागरले निरन्तर शारीरिक तथा मानसिक यातना दिएको, विवाह गर्न अस्वीकार गरेको र सामाजिक सञ्जालमा तस्बिर सार्वजनिक गरिदिने धम्की दिएको आरोप लगाउँदै प्रहरीमा किटानी जाहेरी दिएका थिए। सागरको व्यवहारका कारण प्रियङ्का आत्महत्या गर्न बाध्य भएको जाहेरीमा दाबी गरिएको थियो।

सोही जाहेरीका आधारमा जिल्ला सरकारी वकिल कार्यालयले सागरविरुद्ध मुलुकी अपराध संहिता, २०७४ को दफा १८५ को उपदफा (१) अन्तर्गतको कसुरमा उपदफा (२) बमोजिम सजाय र पीडित राहत कोषबाट क्षतिपूर्ति भराउन माग गर्दै अदालतमा अभियोगपत्र दायर गरेको थियो।

अनुसन्धान अधिकारी र अदालतसमक्षको बयानमा सागरले आफूले प्रियङ्कालाई आत्महत्या गर्न बाध्य पार्ने कुनै काम नगरेको दाबी गरेका थिए। उनले प्रेम सम्बन्ध रहेको स्वीकार गरे पनि घटनाको दिन प्रियङ्काले फोन गर्दा आफू पसलको काममा व्यस्त रहेको र पछि कुरा गर्ने बताएको जिकिर गरेका थिए। त्यस क्रममा प्रियङ्काले आफूलाई पुलबाट हाम फाल्न मन लागेको भनेको र आफूले सम्झाउन खोजेको उनको भनाइ थियो। उनले प्रियङ्कालाई शारीरिक वा मानसिक यातना दिएको आरोपसमेत अस्वीकार गरेका थिए।

तर अदालतले मिसिलमा संलग्न तत्काल प्राप्त प्रमाणका आधारमा सागरलाई हालै निर्दोष मान्न सकिने अवस्था नरहेको ठहर गरेको छ। आदेशमा कल डिटेल रेकर्डले घटनाअघि र घटनाको दिन उनीहरूबीच पटक–पटक फोन सम्पर्क भएको देखाएको उल्लेख छ। त्यस्तै, फेसबुक मेसेन्जरमार्फत प्रियङ्कालाई गालीगलौज तथा अपशब्द लेखेर पठाइएका सन्देश पनि मिसिलमा संलग्न रहेको अदालतले जनाएको छ।

मिसिलमा रहेको अडियो प्रमाणमा प्रियङ्काले सागरसँग ‘किन मलाई टर्चर गर्दैछौ ?’ भनेको सुनिएको विषयलाई समेत अदालतले आधारका रूपमा उल्लेख गरेको छ। डिजिटल प्रमाण र प्रत्यक्षदर्शीको बयानसहितका तथ्यलाई विचार गर्दा मुद्दाको अन्तिम निर्णय नहुँदासम्म सागरलाई थुनामा राखेर पुर्पक्ष गर्नुपर्ने अदालतको निष्कर्ष छ।

अदालतको आदेश पुर्पक्षका लागि थुनामा राख्ने निर्णय हो, कसुरमा दोषी ठहर भइसकेको फैसला भने होइन।