काठमाडौं । राजसंस्था पुनःस्थापनाका लागि भन्दै नवराज सुवेदीको संयोजकत्वमा गठित संयुक्त जनआन्दोलन समितिका प्रवक्ता स्वागत नेपालले स्वार्थी बुढाहरुले आन्दोलन तुहाउने प्रयास गरेको आरोप लगाएका छन् ।

आइतबार सामाजिक संजालमार्फत नेपालले बूढाहरुको स्वार्थ र अहंकारले आन्दोलनलाई कमजोर पार्न समीक्षा बैठक पनि मिडियाको बीचमा गरेर तुहाउने प्रयास गरेको आरोप लगाएका हुन् ।

उनले भनेका छन्, ‘सकेसम्म बुढाहरुलाई मिलाउन सम्झाउन प्रयास गर्यो, तर बूढाहरुको स्वार्थ र अहंकारले आन्दोलनलाई कमजोर पार्न समीक्षा बैठक पनि मिडियाको वीचमा गरेर भताभुङ्ग पारे, जनभावनालाई तुहाउन प्रयास गरे । तर युवाले तुहिन दिने छैन आन्दोलन सफल भएरै छोड्ने छ। केही समयको मात्र धैर्य जरुरी छ। हार नस्वीकार्नेलाई कसैले हराउन सक्दैन साथीहरु ढुक्क हुनुहोला।’

केही दिनअघि समिति स्थानीय तहदेखि आन्दोलन सुरु गर्ने र पछि केन्द्रमा ठूलो जनआन्दोलन गर्ने निर्णय गरेको थियो ।