काठमाडौं । नेपालको डिजिटल भुक्तानी क्षेत्रमा एउटा महत्त्वपूर्ण घटनाक्रमका रूपमा आइएमई पे र खल्ती वालेट औपचारिक रूपमा गाभिएर  साउन १ गतेदेखि ‘खल्ती बाइ आइएमई’ नाममा एकीकृत कारोबार सुरु भएको छ। यो मर्जरसँगै अब एउटै एपमार्फत साविकका १ करोड २७ लाखभन्दा बढी सेवाग्राहीहरूले डिजिटल भुक्तानी सेवाको लाभ लिन सक्नेछन्।

नयाँ कम्पनी ‘आइएमई खल्ती लिमिटेड’ को चुक्ता पुँजी ५४ करोड रुपैयाँभन्दा बढी पुगेको छ, जसले सेवाग्राहीको संख्या र पुँजी दुवै हिसाबले ‘खल्ती बाइ आइएमई’ लाई नेपालकै सबैभन्दा ठूलो डिजिटल वालेट बनाएको छ। यो मर्जरले नेपाली डिजिटल अर्थतन्त्रमा नयाँ आयाम थप्ने विश्वास गरिएको छ।

काठमाण्डौँ । आइएमई’ पे र खल्ती वालेट मर्ज भई, आज (साउन १) गतेबाट ‘खल्ती बाइ आइएमई’ नाममा एकीकृत कारोबार सुरु भएको छ। यसरी एउटै एपमा समेटिएपछि साविकका १ करोड २७ लाख सेवाग्राही कारोबारमा जोडिएका छन् ।

यो मर्जरसँगै बनेको नयाँ कम्पनी ‘आइएमई खल्ती लिमिटेड’ को चुक्ता पुँजी ५४ करोड रुपैयाँभन्दा बढी पुगेको छ । सेवाग्राही र पुँजीले ‘खल्ती बाइ आइएमई’ लाई देशकै सबैभन्दा ठूलो डिजिटल वालेट बनाएको छ । यस मर्जरले नेपाली डिजिटल अर्थतन्त्रमा नयाँ आयाम थप्ने विश्वास गरीएकाे छ ।

यी दुई वालेट मर्जरमा जानु अघि झन्डै एक दशकयता विभिन्न डिजिटल भुक्तानी सेवा प्रदान गर्दै आएका थिए ।

ब्याज दिने एक मात्र वालेट को रूपमा चिनिएको आइएमई पे रेमिटेन्स, इनड्राइभ भुक्तानीजस्ता सेवामा लोकप्रिय थियो भने खल्ती मुभी बुकिङ, इभेन्ट टिकटिङ र आफ्ना इनोभेटिभ फिचरहरूका कारण युवापुस्तामा रुचाइएको थियो।

अब यी दुवै वालेट मर्ज भएर आ–आफ्ना उत्कृष्ट सेवाहरूलाई अझ परिष्कृत, सहज, सरल र सुरक्षित रूपमा प्रदान गर्नेछन्।

साबिक आइएमई पे प्रयोगकर्ताहरूका लागि ‘खल्ती बाइ आइएमई’ मा माइग्रेट हुने सुविधा उपलब्ध छ। यस प्रक्रिया मार्फत आइएमई पे वालेटमा रहेको रकम, ब्याज, रिवार्ड प्वाइन्ट तथा सम्पूर्ण विवरणहरू नयाँ एपमा स्थानान्तरण हुनेछन्।

खल्ती प्रयोगकर्ताहरूले चाहिँ आफ्नो एप अपडेट गरी नयाँ अनुभव लिन सक्ने छन्।

आइएमई पे आइएमई ग्रुप अन्तर्गत सञ्चालन हुँदै आएको थियो भने खल्ती चार जना सह-संस्थापकहरूद्वारा स्थापना गरिएको थियो, जसमा पछि वल्डलिंक, त्रिवेणी ग्रुप जस्ता ठूला कर्पोरेट लगानीकर्ताहरू आबद्ध भएका थिए।

आइएमई डिजिटल सोलुसन्सका अध्यक्ष कृष्ण प्रसाद शर्माले आइएमई पे र खल्तीबीचको मर्जरबाट बनेको आइएमई खल्ती लिमिटेड ले ‘डिजिटल नेपाल’ को सम्भावनालाई नयाँ उचाइमा पुर्‍याउने विश्वास व्यक्त गरेका छन् ।

त्यस्तै, खल्तीका अध्यक्ष मनोज कुमार अग्रवालले नेपाली डिजिटल वित्तीय क्षेत्रको दीर्घकालीन समृद्धिका लागि यो मर्जर एउटा ऐतिहासिक कदम भएको र आइएमई खल्ती लिमिटेड ले देशभर वित्तीय पहुँचको नयाँ युगको सुरुवात गर्ने बताए।

आइएमई खल्ती लिमिटेडका प्रमुख कार्यकारी अधिकृत विनय खड्काले डिजिटल पहुँच विस्तार, डिजिटल साक्षरता तथा समावेशीकरणका लागि थप योजनाहरू रहेको जानकारी दिए।

दुवै कम्पनीले आज एक विशेष कार्यक्रम आयोजना गरी यस मर्जरको औपचारिक घोषणा समेत गर्नेछन्।

आइएमई पे ले Digital Services ICT Award 2024, HRM Award for Corporate Excellence in the FinTech Category 2023 र Visa Leadership Conclave Nepal 2023 मा Excellence in Fintech Partnership Award जस्ता प्रतिष्ठित पुरस्कारहरू प्राप्त गरेको थियो।

यसैगरी, खल्ती ले WITSA Global Innovation & Tech Excellence Awards 2022, 2023 र 2024 मा सम्मान प्राप्त गरेको थियो। साथै, यो कम्पनी NCHL बाट लगातार दुई वर्षसम्म देशकै सबैभन्दा बढी डिजिटल भुक्तानी कारोबार गर्ने सेवा प्रदायकको रूपमा सम्मानित भएको थियो र नेपाल राष्ट्र बैंकबाट डिजिटल कारोबारमा पुर्‍याएको योगदानको लागि उच्च कदर स्वरूप सम्मान प्राप्त गरेको थियो।