काठमाडौं । आदित्य धरको निर्देशनमा बनेको चलचित्र ‘धुरन्धर: द रिभेन्ज’ले भारतीय सिनेमामा नयाँ इतिहास रचेको छ। प्रदर्शनको छोटो अवधिमै फिल्मले भारतमै १ हजार करोड रुपैयाँ नेट कलेक्सन पार गर्दै कीर्तिमान बनाएको हो।

विश्वव्यापी रूपमा फिल्मको व्यापार १६२२ करोड रुपैयाँभन्दा माथि पुगेको छ, जसका कारण यसलाई अल टाइम ब्लकबस्टरको रूपमा हेरिएको छ।

तेस्रो सातामा प्रवेश गर्दा पनि फिल्मको कमाइ घटेको छैन। १६औँदेखि १८औँ दिनसम्मको तेस्रो सप्ताहन्तमा मात्रै फिल्मले ८० करोड रुपैयाँ कमाउन सफल भएको छ।

हालसम्म भारतमा यसको कुल नेट कलेक्सन १०४१ करोड र ग्रस कलेक्सन १२२८ करोड पुगेको छ। फिल्मले आफ्नो पहिलो भागको लाइफटाइम कमाइलाई मात्र १० दिनमै पार गर्दै नयाँ रेकर्ड कायम गरेको हो। साथै, १००० करोड क्लबमा सबैभन्दा छिटो प्रवेश गर्ने विश्वव्यापी भारतीय फिल्मको कीर्तिमान पनि यसैले बनाएको छ।