काठमाडौं। बलिउड अभिनेत्री तमन्नाह भाटियाले दायर गरेको १५ वर्ष पुरानो मुद्दा मद्रास उच्च अदालतले खारेज गरेको छ। उक्त मुद्दा एक साबुन कम्पनीसँगको सम्झौता र तस्बिर प्रयोगसम्बन्धी विवादसँग सम्बन्धित थियो।

तमन्नाहले पावर सोप्स लिमिटेडविरुद्ध १ करोड रुपैयाँ क्षतिपूर्ति माग गर्दै मुद्दा दायर गरेकी थिइन्। उनले सम्झौता समाप्त भएपछि पनि कम्पनीले आफ्ना तस्बिर र विज्ञापन सामग्री बिना अनुमति प्रयोग गरेको आरोप लगाएकी थिइन्।

उनका अनुसार, २००८ मा भएको सम्झौताअनुसार उनले २००९ सम्म मात्र कम्पनीको प्रचार गर्नुपर्ने थियो। तर २०१० र २०११ को बीचमा पनि कम्पनीले आफ्ना उत्पादनमा तस्बिर र भिडियो प्रयोग गरेको दाबी गरेकी थिइन्।

यस विषयमा उनले कम्पनीलाई रोक्न कानुनी सूचना पठाए पनि कुनै प्रतिक्रिया नआएपछि अदालतमा पुगेकी थिइन्। तर प्रारम्भमा उच्च अदालतको एकल इजलासले उनको मुद्दा खारेज गरेको थियो, जसलाई चुनौती दिँदै उनले पुनः अपिल गरेकी थिइन्।

मद्रास उच्च अदालतले भने उनको अपिल अस्वीकार गर्दै एकल इजलासको निर्णयलाई सदर गरेको छ। यससँगै तमन्नाहले दायर गरेको मुद्दा अन्ततः खारेज भएको छ।