काठमाडौं। बलिउडकी चर्चित अभिनेत्री दीपिका पादुकोण र अभिनेता रणवीर सिंह दोस्रो पटक माता-पिता बन्ने भएका छन्। दीपिकाले आइतबार सामाजिक सञ्जालमार्फत आफू गर्भवती भएको र चाँडै दोस्रो सन्तानलाई स्वागत गर्न लागेको जानकारी दिएकी हुन्।

दीपिकाले इन्स्टाग्राममा तस्बिर सेयर गर्दै यो खुसी साटेकी छिन्। तस्बिरमा उनकी छोरी दुआले प्रेग्नेन्सी टेस्ट किट समातेकी छिन् भने दीपिका र रणवीरका हातहरूले उनलाई समातेको देखिन्छ।

यो खुसी सार्वजनिक भएपछि बलिउड क्षेत्रका कलाकार र प्रशंसकहरूले सामाजिक सञ्जालमा बधाई दिएका छन्।

विशेष कुरा के छ भने गर्भावस्थाका बाबजुद पनि दीपिकाले आफ्नो कामबाट ब्रेक नलिने निर्णय गरेकी छिन्। उनी हाल निर्देशक एटलीको फिल्म ‘राका’ को सुटिङमा व्यस्त छिन्, जसमा उनी साउथ सुपरस्टार अल्लु अर्जुनसँग देखिँदैछिन्।

स्रोतका अनुसार दीपिकाले फिल्मका केही एक्सन दृश्यसमेत खिचिरहेकी छिन् र गर्भावस्थाभर सुटिङ जारी राख्ने योजना छ।

दीपिका र रणवीरले सन् २०१८ मा इटालीमा विवाह गरेका थिए। सन् २०२४ सेप्टेम्बरमा उनीहरूले पहिलो सन्तान छोरी दुआलाई स्वागत गरेका थिए।

दीपिकाका हातमा अहिले दुई ठूला फिल्म रहेका छन्। उनी सिद्धार्थ आनन्दको फिल्म ‘किङ’ मा शाहरुख खानसँग देखिनेछिन्, जुन सन् २०२६ डिसेम्बरमा रिलिज हुने तय भएको छ।