काठमाडौं। बलिवुड अभिनेत्री नोरा फतेही फिफा विश्वकप २०२६ को उद्घाटन समारोहमा प्रस्तुति दिने पहिलो बलिउड अभिनेत्री बन्ने भएकी छन्। उक्त समारोह जुन १२ मा क्यानडाको टोरन्टोस्थित बिएमओ मैदानमा आयोजना हुनेछ।

नोरा फतेही यसअघि पनि अन्तर्राष्ट्रिय खेलकुद महोत्सवसँग जोडिइसकेकी छन्। उनले फिफा विश्वकप २०२२ को समापन समारोहमा प्रस्तुति दिएकी थिइन्। साथै उनले अन्तर्राष्ट्रिय क्रिकेट परिषद् (आईसीसी) पुरुष टी–२० विश्वकप २०२६ को उद्घाटन समारोहमा पनि प्रस्तुति दिएकी थिइन्। 

यससँगै उनी फुटबल र क्रिकेट दुवै विश्वकपका प्रमुख समारोहमा प्रस्तुति दिने पहिलो बलिउड कलाकार बन्ने भएकी छन्।

फिफा विश्वकप २०२६ अमेरिका, मेक्सिको र क्यानडामा संयुक्त रूपमा आयोजना हुँदैछ। प्रतियोगिता तीन देशमा हुने भएकाले फिफाले प्रत्येक आयोजक राष्ट्रमा अलग–अलग उद्घाटन समारोह गर्ने योजना बनाएको छ।

क्यानडामा हुने समारोहमा नोरा फतेहीसँगै बङ्गलादेशी मूलका अमेरिकी डिजे सञ्जयको पनि प्रस्तुति रहनेछ। सञ्जयले यसअघि बलिउड चलचित्र ‘रा.वन’ को चर्चित गीत ‘छम्मक छल्लो’ को आधिकारिक पुनःसंयोजन तयार गरेका थिए।

विश्वप्रसिद्ध कलाकारहरूको सहभागिता

क्यानडाको उद्घाटन कार्यक्रममा माइकल बुब्ले, एलानिस मोरिसेट, एलेसिया कारा, एलियाना, जेसी रेयेज, वेजिड्रिम र विलियम प्रिन्सलगायत कलाकारको पनि प्रस्तुति रहनेछ।

अमेरिकामा हुने उद्घाटन समारोहमा गायिका केटी पेरीको प्रस्तुति रहनेछ। यो कार्यक्रम जुन १२ मा लस एन्जलसस्थित सोफी रंगशालामा अमेरिका र पाराग्वेबीचको खेलसँगै हुनेछ। केटी पेरीसँगै लिसा, टायला, अनिता र रेमाले पनि प्रस्तुति दिनेछन्।

मेक्सिको सिटीमा जुन ११ मा हुने उद्घाटन समारोहमा टायला, अलेजान्द्रो फर्नान्डेज, ड्यानी ओसन, लिला डाउन्स, बेलिन्डा, जे बाल्भिन तथा लस एन्जेलिस अजुल्स र माना समूहको प्रस्तुति रहनेछ।

शकिराको नयाँ गीतको घोषणा

यसैबीच गायिका शकिराले फिफा विश्वकप २०२६ का लागि नयाँ गीत ‘दाई दाई’ सार्वजनिक गर्ने घोषणा गरेकी छन्। उक्त गीतमा नाइजेरियाली गायक बर्ना ब्वाय पनि सहभागी हुनेछन्। शकिराको सन् २०१० को विश्वकप गीत ‘वाका वाका’ विश्वव्यापी रूपमा अत्यन्तै लोकप्रिय बनेको थियो।

फिफा विश्वकप २०२६ जुन ११ देखि जुलाई १९ सम्म सञ्चालन हुनेछ। प्रतियोगितामा कुल १०४ खेल खेलाइनेछन्। पहिलो खेल मेक्सिको सिटीमा हुनेछ भने फाइनल खेल अमेरिकाको न्यु जर्सीमा आयोजना गरिनेछ।