पोखरा। बाढी प्रभावित क्षेत्रसहित विभिन्न जिल्लाबाट पोखरा ल्याइएका ७६ वटा शव मंगलबार जमिनमुनि व्यवस्थापन गरिएको छ ।

धादिङ, तनहुँ, गोरखा र पूर्वी नवलपरासीबाट ल्याइएका १ सय २ शवमध्ये ७६ वटा शव पोखरा महानगरपालिका–१६ स्थित सेती नहर छेउको वन क्षेत्रमा व्यवस्थापन गरिएको कास्की प्रहरीले जनाएको छ । शवलाई अन्तर्राष्ट्रिय मापदण्डअनुसार व्यवस्थापन गरिएको हो ।

कुल १ सय २ शवमध्ये १९ वटा पहिचान खुलेपछि आफन्तलाई जिम्मा लगाइएको छ । बाँकीमध्ये ७ वटा शवको पोस्टमार्टम तथा डीएनए नमुना संकलनको प्रक्रिया अस्पतालमा जारी रहेकाले मंगलबार ती शव व्यवस्थापन नगरिएको प्रहरीले जनाएको छ ।

पहिचान नभएका ८३ शव व्यवस्थापन गर्ने तयारी भए पनि पहिचान प्रक्रिया, पोस्टमार्टम र डीएनए संकलनको काम बाँकी रहेकाले तत्काल ७६ शव मात्र व्यवस्थापन गरिएको हो ।

शव व्यवस्थापनअघि आवश्यक नमुना तथा विवरण सुरक्षित राखिएको जनाइएको छ ।

तस्वीर : नेपाल फोटो लाइब्रेरी