काठमाडौं । भोटेकोशी र त्रिशूलीसहित विभिन्न नदी तथा खोलामा आज पानीको बहाव बढ्न सक्ने भन्दै बाढी पूर्वानुमान महाशाखाले उच्च सतर्कता अपनाउन आग्रह गरेको छ।

जलस्रोत तथा जलविज्ञान अनुसन्धान केन्द्रअन्तर्गतको बाढी पूर्वानुमान महाशाखाका अनुसार विशेषगरी रसुवा र नुवाकोट हुँदै बग्ने नदीमा आकस्मिक बाढीको जोखिम उच्च रहेको छ।

महाशाखाकी बाढीविद् सरस्वती विष्टका अनुसार नेपाल–चीन सीमा आसपास बनेको ताल फुट्ने सम्भावना कायमै रहेकाले भोटेकोशी र त्रिशूली नदी आसपासका बासिन्दालाई थप सचेत रहन आग्रह गरिएको हो। वर्षाको सम्भावनासमेत रहेकाले आज र भोलि रसुवा तथा नुवाकोटमा बाढीको जोखिम उच्च रहने उनले बताइन्।

उनका अनुसार ताप्लेजुङ, सङ्खुवासभा, सोलुखुम्बु, रामेछाप, दोलखा, सिन्धुपाल्चोक, काभ्रेपलाञ्चोक, ललितपुर, भक्तपुर, काठमाडौं, धादिङ, मकवानपुर, चितवन, गोरखा, तनहुँ, लमजुङ, मनाङ, कास्की, स्याङ्जा, पर्वत, म्याग्दी, बागलुङलगायत जिल्लाका नदी तथा खोलामा पनि पानीको सतह बढ्न सक्ने पूर्वानुमान गरिएको छ।

त्यस्तै रुकुम पूर्व, रुकुम पश्चिम, रोल्पा, सल्यान, सुर्खेत, जाजरकोट, दार्चुला, बैतडी, डडेल्धुरा र कञ्चनपुर आसपासका नदी तथा खोलामा समेत बहाव बढ्ने सम्भावना रहेको महाशाखाले जनाएको छ।

महाशाखाले साना नदी तथा खोलामा समेत एक्कासि बाढी आउन सक्ने भएकाले नदी किनार र तटीय क्षेत्रमा बसोबास गर्ने नागरिकलाई विशेष सावधानी अपनाउन आग्रह गरेको छ। नदी किनार हुँदै यात्रा गर्दा समेत सतर्कता अपनाउन र जोखिमयुक्त क्षेत्रमा नजान महाशाखाले अनुरोध गरेको छ।