काठमाडौं । नेपाली कम्युनिस्ट पार्टीका नेता वर्षमान पुनले प्रधानमन्त्री बालेन्द्र शाहसँग भेटवार्ता गरेका छन्।

बिहीबार सिंहदरबारस्थित प्रधानमन्त्री तथा मन्त्रिपरिषद्को कार्यालयमा भएको भेटमा रसुवाको भोटेकोशी नदीमा आएको विनाशकारी बाढी र त्यसपछि जारी खोज तथा उद्धार अभियानबारे छलफल भएको प्रधानमन्त्रीको सचिवालयले जनाएको छ।

भेटमा बाढी प्रभावित क्षेत्रमा घाइतेको उपचार, राहत वितरण तथा प्रभावित नागरिकलाई तत्काल आवश्यक सहयोग पुर्‍याउने विषयमा पनि कुराकानी भएको थियो।

त्यसैगरी, बाढीका कारण क्षतिग्रस्त सडक, पुल, विद्युत्, सञ्चारलगायत पूर्वाधारलाई तत्काल सञ्चालनमा ल्याउने र दीर्घकालीन रूपमा पुनःनिर्माण गर्ने विषयमा समेत छलफल भएको बताइएको छ।

प्रधानमन्त्री शाहले यसअघि उज्यालो नेपाल पार्टीका अध्यक्ष तथा पूर्वऊर्जामन्त्री कुलमान घिसिङसँग पनि भेट गरेका थिए।

घिसिङसँगको भेटमा समेत रसुवाको बाढी, जलविद्युत् आयोजनाका सुरुङमा फसेकाको उद्धार र प्रभावित पूर्वाधार पुनः सञ्चालनका विषयमा छलफल भएको प्रधानमन्त्रीको सचिवालयले जनाएको छ।