काठमाडौं । रसुवा बाढीबाट प्रभावित नागरिकका लागि चीनले उपलब्ध गराएको आपतकालीन राहत सामग्रीको तेस्रो खेप बिहीबार नेपाल आइपुगेको छ।

चिनियाँ जनमुक्ति सेनाको वायुसेनाको ठूलो क्षमताको वाई-२० ए मालवाहक विमानमार्फत राहत सामग्री त्रिभुवन अन्तर्राष्ट्रिय विमानस्थल ल्याइएको हो।

चीनबाट आएको सहयोगमा शव व्यवस्थापनका लागि आवश्यक फ्रिजर, महामारी नियन्त्रण तथा रोकथामका सामग्री, दैनिक उपभोग्य वस्तु र विपद्पछि तत्काल आवश्यक पर्ने अन्य सामग्री छन्।

यसपटकको सहयोगमा उद्धार, आवतजावत र पुनःस्थापनाका लागि आवश्यक बेलीब्रिज पनि समावेश गरिएको छ। बेलीब्रिज जडान गर्न आवश्यक विशेष उपकरण भने स्थलमार्ग हुँदै लिजी–नेचुङ सीमा नाकासम्म ल्याइसकिएको जनाइएको छ।

यसैबीच, शव पहिचान प्रक्रियामा प्राविधिक सहयोग गर्न चीनबाट १० जना फरेन्सिक विज्ञको टोली पनि नेपाल आएको छ। टोलीले नेपाली सम्बन्धित निकायसँग समन्वय गरी शव पहिचान तथा आवश्यक फरेन्सिक परीक्षणमा सहयोग गर्नेछ।

राहत सामग्री हस्तान्तरणका लागि विमानस्थलमा आयोजित कार्यक्रममा नेपालका लागि चिनियाँ राजदूत झाङ माओमिङ र विज्ञान, प्रविधि तथा नवप्रवर्तनमन्त्री महावीर पुन सहभागी थिए।

मन्त्री पुनले नेपाल आएको चिनियाँ फरेन्सिक विज्ञको टोलीलाई स्वागत गरेका थिए।