काठमाडौं। रसुवास्थित भोटेकोशी नदीमा भदौ १० गते आएको बाढीमा परी घाइते भएकामध्ये ३८ जना उपचारपछि अस्पतालबाट घर फर्किएका छन्।

बाढीबाट घाइते भएका ५० जनालाई उपचारका लागि काठमाडौंस्थित राष्ट्रिय ट्रमा सेन्टर ल्याइएको थियो। उपचारपछि स्वास्थ्य अवस्थामा सुधार आएपछि हालसम्म ३८ जनालाई डिस्चार्ज गरिएको जिल्ला प्रहरी परिसर काठमाडौंले जनाएको छ।

प्रहरीका अनुसार ट्रमा सेन्टरमा अहिले १२ जना घाइते उपचाररत छन्। उनीहरूमध्ये अधिकांशको अवस्था सामान्य रहेको र साधारण शय्यामा राखेर उपचार भइरहेको अस्पताल प्रशासनले जनाएको छ।

बाढीमा घाइते तथा सम्पर्कविहीन व्यक्तिका आफन्तलाई आवश्यक सूचना उपलब्ध गराउन नेपाल प्रहरीले वीर अस्पताल र राष्ट्रिय ट्रमा सेन्टरमा नागरिक सहायता कक्षसमेत सञ्चालनमा ल्याएको छ।

सहायता कक्षमा पुगेर आफन्तहरूले उपचाररत परिवारका सदस्यको स्वास्थ्य अवस्थाबारे जानकारी लिइरहेका छन्। सम्पर्कविहीन व्यक्तिका आफन्तले आफ्ना परिवारका सदस्यको विवरणसमेत प्रहरीलाई उपलब्ध गराइरहेका छन्।

भोटेकोशी बाढीबाट ठूलो जनधनको क्षति भएपछि प्रभावित क्षेत्रमा खोज तथा उद्धार कार्य जारी छ। घाइतेको उपचारसँगै सम्पर्कविहीनको खोजी र पीडित परिवारसँग समन्वयलाई प्राथमिकतामा राखिएको प्रहरीले जनाएको छ।

उद्धार गरिएका घाइतेको उपचार तथा प्रभावित परिवारलाई आवश्यक सहयोग उपलब्ध गराउने काम पनि सँगसँगै अघि बढाइएको छ।