काठमाडौं। मदन पुरस्कार गुठीले मदन पुरस्कार–२०८२ का लागि वीणा जोशी (राजभण्डारी) को पुस्तक ‘नेवार समुदायका परम्परागत मुकुन्डोनाच’ छनोट गरेको छ ।

गुठीले आइतबार उक्त कृतिलाई यस वर्षको मदन पुरस्कार प्रदान गर्ने निर्णय सार्वजनिक गरेको हो ।

मदन पुरस्कारका लागि यसअघि उत्कृष्ट १० कृतिको श्रेष्ठ सूची सार्वजनिक गरिएको थियो । त्यही सूचीबाट जोशीको पुस्तक पुरस्कारका लागि छनोट भएको गुठीका अध्यक्ष कुन्द दीक्षितले जानकारी दिए ।

नेवार समुदायमा प्रचलित परम्परागत मुकुन्डोनाचको सांस्कृतिक पक्ष, इतिहास र परम्परालाई समेटिएको उक्त कृति यस वर्षको पुरस्कारका लागि उत्कृष्ट ठहरिएको हो ।

मदन पुरस्कार गुठीले पछिल्ला वर्षमा पुरस्कारका लागि प्राप्त कृतिमध्ये बढीमा १० वटा पुस्तकलाई श्रेष्ठ सूचीमा राख्दै आएको छ । वि.सं. २०७२ देखि यो अभ्यास निरन्तर छ । गुठीको छनोट प्रक्रियामा मौलिक तथा अप्रकाशित सामग्रीको बाहुल्यलाई समेत महत्वपूर्ण आधार मानिन्छ ।

वि.सं. २०१२ मा स्थापना भएको मदन पुरस्कार गुठीले २०१३ सालदेखि नेपाली भाषामा प्रकाशित उत्कृष्ट साहित्यिक तथा ज्ञानमूलक कृतिलाई मदन पुरस्कार प्रदान गर्दै आएको छ ।

पहिलो मदन पुरस्कार २०१३ सालमा तीन विधाका कृतिलाई प्रदान गरिएको थियो । गद्यतर्फ सत्यमोहन जोशीको ‘हाम्रो लोक संस्कृति’, सामाजिक शास्त्रतर्फ चित्तरञ्जन नेपालीको ‘जनरल भीमसेन थापा र तत्कालीन नेपाल’ र विज्ञानतर्फ बलराम जोशीको ‘अधिकविभव स्थिरविद्युत् उत्पादक’ कृति पुरस्कृत भएका थिए ।

वि.सं. २०७५ देखि मदन पुरस्कारको राशि चार लाख रुपैयाँ कायम गरिएको छ ।