काठमाडौं। रसुवा बाढीमा बेपत्ता भएका आफन्तको खोजी तीव्र बनाउन माग गर्दै त्रिशूली-३ बी जलविद्युत् आयोजनामा कार्यरत कर्मचारीका परिवार तथा आफन्तले माइतीघर मण्डलामा प्रदर्शन गरेका छन् ।

बाढी आएको लामो समय बितिसक्दा पनि आफन्तको अवस्था पत्ता लाग्न नसकेको भन्दै उनीहरूले सरकारको ध्यानाकर्षण गराएका हुन् ।

प्रदर्शनमा सहभागीहरूले बेपत्ताको तस्बिरसहितका ब्यानर बोकेका थिए । खोजी कार्यमा ढिलाइ भएको भन्दै उनीहरूले उपलब्ध सबै स्रोतसाधन परिचालन गरी बेपत्ताको खोजीलाई प्राथमिकता दिन माग गरेका छन् ।

परिवारजनले बेपत्ताको अवस्था थाहा नहुँदा मानसिक तनाव र चिन्ता बढिरहेको बताएका छन् । उनीहरूले खोजी तथा उद्धारका लागि आवश्यक प्रविधि, दक्ष जनशक्ति र सुरक्षा संयन्त्र परिचालन गर्नसमेत सरकारसँग आग्रह गरेका छन् ।

बाढीपछि विभिन्न क्षेत्रमा बेपत्ता भएकाहरूको खोजी तथा उद्धार जारी रहे पनि धेरैको अवस्था अझै अज्ञात छ ।