काठमाडौं। जेनजी विद्रोहले ल्याएको राजनीतिक परिवर्तनको जगमा प्रधानमन्त्री बनेका वालेन्द्र शाह(बालेन) जेनजी शहीदहरूको सम्झनामा आयोजित सरकारी कार्यक्रममा अनुपस्थित रहे।

मंगलबार सरकारले जेनजी शहीदहरूको स्मृतिमा कार्यक्रम आयोजना गरेको थियो। प्रधानमन्त्री शाह भने कार्यक्रममा पुगेनन्। शहीदप्रति श्रद्धाञ्जली व्यक्त गरेनन्। शहीद परिवारसँग समवेदना पनि प्रकट गरेनन्।

सामाजिक सञ्जालमा सक्रिय रहने शाहले जेनजी शहीदहरूको सम्झनामा फेसबुकमार्फत समेत कुनै सन्देश दिएका छैनन्।

जेनजी विद्रोहले देशको राजनीतिक दिशा नै परिवर्तन गरेको थियो। आन्दोलनपछि तत्कालीन सरकार ढल्यो। संसद् विघटन भयो। त्यसपछि सुशीला कार्कीको नेतृत्वमा अन्तरिम सरकार बन्यो।

संसदको निर्वाचन भयो। जेनजी आन्दोलनको प्रतिनिधिमूलक शक्तिका रूपमा प्रस्तुत रास्वपा झण्डै दुई तिहाई
बहुमतसहित संसद्मा आयो। त्यही राजनीतिक परिवर्तनपछि बालेन प्रधानमन्त्री बने।

तर, सत्तामा पुगेपछि बालेन सरकारले जेनजीलाई भुल्यो । जेनजी शहीदहरु बेवास्तामा परे ।
जेनजी आन्दोलनले सुशासन मागेको थियो। भ्रष्टाचार अन्त्य गर्न दबाब दिएको थियो। नातावाद र राजनीतिक पहुँचका आधारमा हुने नियुक्तिको विरोध गरेको थियो।

तर, अहिले सरकारमाथि नै अपारदर्शिताको आरोप लागेको छ। गृहमन्त्री सुधन गुरुङको शेयर लगानीसम्बन्धी प्रतिवेदन सार्वजनिक नगरिएको विषय विवादमा छ।

अर्थमन्त्री डा. स्वर्णिम वाग्लेमाथि व्यापारीलाई करसम्बन्धी सूचना चुहाएको आरोप लागेको छ। उक्त विषयबाट राज्यलाई दुई अर्ब रुपैयाँभन्दा बढी क्षति पुगेको आरोप छ। तर, यसबारे सरकारले स्पष्ट र प्रभावकारी जवाफ दिएको छैन।

प्रधानमन्त्री शाहमाथि पनि नातावादको आरोप लागेको छ। आफ्ना प्रमुख सल्लाहकार कुमार बेनका दाजु र बहिनीलाई नियुक्ति दिलाएको आरोप उठेको छ।

सार्वजनिक निकायमा पनि राजनीतिक निकटताका आधारमा नियुक्ति भइरहेको आलोचना छ। सरकारमाथि ‘सार्वजनिक संस्थामा रास्वपातन्त्र स्थापित गर्न खोजिएको’ आरोपसमेत लागिरहेको छ।